भांगरभूंय | प्रतिनिधी
पणजी, बातमीदार ः वेदांताच्या व्हॅल्यू अॅडेड बिझनेस (व्हीएबी) कंपनीन आपल्या ‘ग्राम निर्माण’ प्रकल्पा खाला गोंयच्या नावेली हांगा थळाव्या शेतकारां मदीं शेतकी पद्दत वाडोवपाच्या हेतान कार्यशाळा घडोवन हाडली. दुरीगवाड्याच्या श्री बेताल देवळाच्या सभघरांत आयोजीत केल्ल्या ह्या कार्यावळींत आधुनीक तंत्र आपणावपाची आनी शेतकी वाड करपा खातीर सरकारी मजत मेळोवपाक उत्सुक आशिल्ल्या 50 परस चड शेतकारांनी वांटो घेतिल्लो.
कार्यशाळेंत सांखळेच्या विभागीय शेतकी कार्यालयाचे सहाय्यक शेतकी अधिकारी पंकज पोकळे हांणी शेतकारांक शेतकी उपक्रमां खातीर उपलब्ध आशिल्ल्या वेगवेगळ्या सरकारी अनुदानाची आनी येवजणांची म्हायती दिली. हांतूत नांगरप, कापणी, यंत्रणा खरेदी, बांय बांदप आनी पिकाचें लुकसाण उणें करपाची रणनिती अशा म्हत्वाच्या गजालींचो आस्पाव आशिल्लो.
कार्यशाळेंत वांटो घेवन शेतकी तंत्रज्ञान वेवस्थापन एजन्सी (एटीएमए), सांखळीचें प्रतिनिधित्व करपी ब्लॉक तंत्रज्ञान वेवस्थापक पूनम हांणी प्रगत भाताची लागवड पद्दती विशीं मोलादीक म्हायती दिली. तिणें हळद आनी मॅरीगोल्ड लागवड, कुक्कुटपालन आनी म्होंवामूसा पोसपा खातीर आशिल्ल्या येवजण्यांचेर भर दिलो, जाका लागून शेतकारांक शेतकी वेवसायांत विविधताय हाडपाची संद मेळटा. तशेंच सिस्टम ऑफ राइस इंटेन्सिफिकेशन (एसआरआय) तंत्राचो येसस्वी अणभव सांगतना मायनाचो शेतकार सुंदर नायक हांणी भाताचें उत्पादन टिकावूपणान वाडोवपा खातीर वेव्हारीक गिन्यान दिवन सहकारी शेतकारांक प्रेरणा दिली.
अशा उपक्रमांचें म्हत्व रेखांकित करून व्हीएबीचे सीईओ सप्तेश सरदेसाय हांणी म्हणलें, आमचो ‘ग्राम निर्माण’ प्रकल्प टिकावू शेतकी पद्दतींक चालना दिवपाक आनी थळाव्या शेतकारांक गिन्यान आनी साधनां वरवीं सशक्त करपाक व्हॅबच्या समर्पणाचे प्रतीक जावन आसा.
कार्यशाळेचो लावार्थी उल्हास गावस हांणी म्हणलें, वेदांत आनी वनराय पंगडान नावेलींत शेतकारांक हें जागृताय सत्र घडोवन हाडून तोखणायेचें काम केलां. अशा उपक्रमा वरवीं शेतकारांक संद मेळटात आनी तांकां शेतकी क्षेत्राक पुरायपणान आपणावपाक तेंको दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
