भांगरभूंय | प्रतिनिधी
नवी दिल्ली, खबरां संस्था: लोकसभेच्या अध्यक्षपदा खातीर सत्ताधारी एनडीएन ओम बिर्ला हांच्या नांवाचो प्रस्ताव मांडलो. जाल्यार विरोधी पक्षा कडल्यान के. सुरेश हांच्या नांवाचो प्रस्ताव मांडलो. नरेंद्र मोदी हांणी मांडिल्ल्या ओम बिर्ला हांच्या नांवाचो प्रस्ताव आवाजी मतदानान स्विकारिल्ल्याची घोशणा तात्पुर्तो अध्यक्ष बर्तृहारी महताब हांणी केली. ते प्रमाण १८वे लोकसभेच्या अध्यक्षपदार ओम बिर्ला हांची निवड जाल्ल्याची घोशणा जाली.
मजगतीं, लोकसभा अध्यक्ष पदा खातीर वट्ट ४८ वर्सांनी वेंचणूक जाली. ही वेंचणूक जाले उपरांत प्रधानमंत्री नरेंद्र मोदी आनी राहुल गांधी हांणी ओम बिर्ला हांकां अध्यक्षपदाचे खुर्चे मेरेन पावयलें.
लोकसभेच्या अध्यक्षपदा खातीर सत्ताधारी एनडीएन ओम बिर्ला हांच्या नांवाचो प्रस्ताव मांडलो. प्रधानमंत्री नरेंद्र मोदी हांणी ओम बिर्ला हांचें नांव अध्यक्षपदा खातीर मांडलें. प्रधानमंत्री नरेंद्र मोदी हांचे सयत सत्ताधारी एनडीएच्या १३ घटक पक्षांनीय प्रस्ताव मांडलो. प्रधानमंत्री नरेंद्र मोदी, राजनाथ सिंह, ललन सिंह, अमित शाह, नितीन गडकरी, शिवराज सिंह चौहान, जीतनराम मांझी, कुमारस्वामी, चिराग पासवान, सुनील तटकरे, अनुप्रिया पटेल, अन्नपूर्णा देवी हांणी ओम बिर्ला हांचो अर्ज मान्य केलो.
के. सुरेश हांच्या नांवाचो प्रस्ताव शिवसेना उद्धव बाळासायब ठाकरे पक्षाचे खासदार अरविंद सावंत हांणी मांडलो. एन.के. प्रेमचंद्रन, पंकज चौधरी, तारिक अन्वर, सुप्रिया सुळे हांणी तो मान्य केलो.
आवाजी मतदानान जाली निवड
ओम बिर्ला आनी के. सुरेश हांचे प्रस्ताव सत्ताधारी आनी विरोधी पक्षां कडल्यान मांडल्या उपरांत तात्पुरते अध्यक्ष बर्तृहारी महताब हांणी आवाजी मतदान घेतलें. आवाजी मतदानान ओम बिर्ला हांची निवड जाल्ल्याची घोशणा महताब हांणी केली.
ओम बिर्ला हांचे विशीं
ओम बिर्ला हे राजस्थानांतले कोटा लोकसभा मतदारसंघांतल्यान जैतिवंत जाल्या. तशेंच तांणी सतरावे लोकसभेंतूय लोकसभा अध्यक्ष म्हणून काम केलां. तात्पुरते अध्यक्ष बतृहारी महताब हांणी ओम बिर्ला हांच्या नांवाची घोशणा केल्या उपरांत प्रधानमंत्री नरेंद्र मोदी, विरोधी पक्षाचे फुडारी राहुल गांधी आनी संसदीय कामकाज मंत्री किरेन रिजीजू हांणी ओम बिर्ला हांकां परबीं भेटयलीं. उपरांत सगळ्या खासदारांनीय ओम बिर्ला हांकां ताळयो वाजयत परबीं भेटयलीं. उपरांत प्रधानमंत्री नरेंद्र मोदी, राहुल गांधी आनी किरेन रिजीजू हांणी ओम बिर्ला हांकां खुर्चे मेरेन पावयले.
पगधानमंत्री नरेंद्र मोदी हांणी ओम बिर्ला हांच्या अध्यक्षपदाच्या कार्यकाळांत १७वे लोकसभेंत महत्त्वाचे निर्णय घेतिल्ल्याची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
