भांगरभूंय | प्रतिनिधी
राजर्षी छत्रपती शाहू महाराज हांणी अर्थकारणाचो बारीकसाणीन अभ्यास केल्लो. समाजांतल्या सगल्या घटकांक आस्पावन घेवपी तांचें अर्थीक उदरगतीचे धोरण आशिल्ले. समाजीक पांवड्यार विषमता उणी करपा खातीर राजर्षीन आपूणजावन यत्न केल्लें, तशेंच तांणी अर्थीक समता प्रस्थापित करपा खातीरूय केल्लें. तांच्या ह्या यत्नांक लागुनूच कोल्हापूर जिल्हो अर्थीक नदरेन आयजूय समृद्ध आसा.
894 ते 1922 ह्या काळांत कोल्हापूरचे छत्रपती शाहू महाराज एक प्रजाहीत जपपी, धाडसी समाज सुदारक आनी बहुजन समाज्या उदरगती खातीर काम करपी एक राजा म्हूण फामाद जाले. प्रजेच्या कल्याणा खातीर तांणें आपल्या अधिकारांचो वापर केलो. कोल्हापूर संस्थानांत तांणी आपले कार्य केलें, मात ताचें परिणाम पुराय महाराष्ट्रभर दिसलो.
शाहू महाराज हांणी आपल्या जनतेच्या अर्थीक उदरगती खातीर आधुनीक अर्थ शास्त्राच्या विवीध म्हत्वाच्या क्षेत्रांत भव्यदिव्य कामगिरी केली. कोल्हापूर संस्थानाचो पुराय कायापालट करपाचे स्रय महाराजांक वता. महाराजान त्या काळांत जें काम केलें तें खुबूच म्हत्वाचे आसा. तांणी ज्या फांटभुयेर, ज्या परिस्थितींत हें काम केले ते समजून घेतल्यार महाराजांची महानता कळटली. अर्थीक उदरगतीक मार्ग मेकळो करपाक तांणी खुबशें प्रगतशील उपाय केलें.
समाजीक सुदारणा आनी सक्षमीकरणा खातीर छत्रपती शाहू महाराज हांणी दिल्ल्या योगदानांतलें एक म्हणल्यार समाजीक न्याय आनी समतेविशीं तांचें कार्य. जाती वेवस्थेतलो अन्याय वळखून तांणी मागास जातींच्या उदरगती खातीर खुबशी धोरणां चालीक लायलीं. खासा करून उपेक्षीत समुदाया खातीर शाळा आनी म्हाविद्यालयांची थापणूक केली, तांका शिक्षणाची संद दिली. शिक्षणा खातीर मागास जातींतल्या लोकांक जीणेचें साधन मेळ्ळें आनी तांच्या प्रदेशाच्या उदरगतीक तांचें अर्थपूर्ण योगदान मेळ्ळें.
शाहू महाराज हांणी खासा करून बायलां सक्षमीकरणाचेर भर दिलो. तांची स्थिती सुदारूंक तांच्या शिक्षणा खातीर तांणी नेट धरलो. समाजीक, अर्थीक कार्यांत तांणी वांटेकार जावचें म्हूण आग्रह केलो. कोल्हापूर जिल्ह्याच्या समाजीक उदरगतींत शाहू महाराज हांचो मोलाचो वांटो आसा.
अर्थीक उदरगती खातीर शाहू महाराज हांणी शेतकी उत्पादनां सुदारपा खातीर जमनींचे न्याय वितरण सुनिश्चीत करपा खातीर म्हतावचें जमीन सुदारणा सुरू केले. जमीनदारांची शोषणात्म प्रथा ना करपाच्या हेतान तांणी कांय धोरणां हाडली आनी त्या धोरणांच्या माध्यमांतल्यान शेतकार समुदायाक सक्षम केले. ह्या सुदारणेक लागून शेतकी उत्पादनांक बरें दीस आयलेच, गांवगिऱ्या वाठारांतल्या लोकांची जीणूय सुदारली.
महाराज उद्देगीकरणाचे कट्टर समर्थक आशिल्लें. तांणी कोल्हापुरांत उद्देगांच्या थापणुकेक उर्बा दिली. कापड उद्देग, साकर आनी अभियांत्रिकी ह्या सारक्या क्षेत्रांचेर लक्ष केंद्रीत केले. तांच्या ह्या धोरणाक लागून गुंतवणूक आनी उद्देगिक क्षेत्रांत आकर्षण निर्माण जालें. जाका लागून जिल्ह्याच्या अर्थीक समृद्धीक पालव दिवपी उद्देगीक क्षेत्र उदेंले.
शाहू महाराज हांणी रस्ते, पूल आनी भौशीक इमारती बांदून शाराच्या साधनसुविधांचे आधुनिकीकरण केले. ह्या उदरगतीक लागून फकत जिल्ह्यांतली कनेक्टिविटी वाडूंक ना, तर वेपार आनी वाणिज्य क्षेत्रांतली कार्याय सोपी जाली. कोल्हापूराच्या अर्थीक उदरगतीक प्रभावी गती मेळ्ळी. शाहू महाराजांचो काळ म्हणल्यार कोल्हापूराच्या परिवर्तनाचो काळ आशिल्लो. तांची दूरदृष्टीची
नदर शाश्वत उदरगतीक उपेगी थारली. नवें पिळगेक उर्बा
दिवपी थारली. आयज कोल्हापूर जिल्ह्यांतले अर्थकारण आनी समाजकारण समृद्ध जालां. ताचें स्रय राजर्षी शाहू महाराज हांकांच वता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
