भांगरभूंय | प्रतिनिधी
आसगांवां घर मोडपा सयत बापूय-पुताचें अपहरण प्रकरण
म्हापशें: भायरो आल्तो, आसगांवां प्रदीप आगरवाडेकार हांचे घर जेसीबीच्या आदारान मोडपा सयत आगरवाडेकार बापूय-पुताचें अपहरण केल्ल्या प्रकरणांत हणजूण पुलिसांनी रिअल इस्टेट एजंट दुबावीत अर्शद ख्वाजा (51, दोना पावला) हाका अटक केली. पयर प्रदीप राणा (28, कांदोळी) हाका अटक केल्ली.
मजगतीं, मंगळारा कळंगूटचे आमदार मायकल लोको आनी शिवोलीच्यो आमदार डिलायला लोबो हांणी घडणूक थळाक भेट दिली. पिडितांचे घर मोडपाचे निर्देश दिल्ले. सदर संबंदीत मनशाक पुलिसांनी अटक करची. आगरवाडेकार कुटुंबाचें जाल्लें लुकसाण भरपायेचो खर्च संबंदितां कडल्यान वसूल करचो अशी मागणी तांणी केली.
आमदार मायकल लोबो हांणी म्हणलें, ही घडणूक सामकी दुर्दैवी आनी खेदजनक आसा. सद्या गोंया भायल्यां खातीर गोंय हें ‘सेकंड होम’ जालां. दरेकलो गोंयांत जमीन विकती घेवंक पळयता, आनी हातूंतल्यान गोंयकार ह्या लोकां खातीर ‘सॉफ्ट टार्गेट’ जाल्यात. ह्या प्रकरणांतल्या दोशींक अटक जावंकूच जाय. तिसऱ्या मनशाक वा एजंटाक अटक करून हो प्रस्न सुटावो जावचो ना.
जेसीबीचो वापर केल्ल्यान पुराय घराक घात निर्माण जाला. आगरवाडेकार हांचें घर परतून नव्यान बांदून दिवपा खातीर आमी कंत्राटदार उपलब्ध करून दिवं, न्यायालयाचो निर्णय येवपाक खूब वर्सां लागतलीं. पिडीत कुटुंबान अशा अर्दवट मोडिल्ल्या घरांत रावचें? ते खातीरूच दोशीं कडल्यान भरपायेचो खर्च वसूल करपाची गरज आसा. विक्रीपत्र केलें हाचो अर्थ दुसरी व्यक्ती रोखडीच त्या मालमत्तेची धनी जायना. आगरवाडेकार कुटूंब हें फाटलीं 25 वर्सां हांगा रावता. तांचे कडेन घराचो ताबो आसा. ही गजाल विसरून चलची ना अशें लोबो हांणी म्हणलें.
हो विशय हांवें मुख्यमंत्र्यां कडेन मांडला. आयज हांव आमदार न्हय जाल्यार गोंयकार ह्या नात्यान उलयतां, जबरदस्तीन कोणाकूय घरा भायर काडप कायद्यान गुन्यांव थारता. डिसेंबर 2016 वर्सा आगरवाडेकार कुटुंबान वीज बील आनी घटपट्टी आपल्या नांवार करून घेतल्या. भाटकारान पिडीत कुटुंबाक हरकत ना दाखलो दिला. आसगांवां जमनीचें मोल तेंगशेर पावलां. हांगा प्रती चौरस मिटर सुवात 80 हजार ते एक लाख रुपयांक विकतात. ताका लागून खूबशा जाणांक आस जाल्या अशें लोबो हांणी म्हणालें.
मजगतीं, समाजीक कार्यकर्त्यो प्रतिमा कुतिन्हो हांणी म्हणलें, हे घडणुकेचो हांव निशेध करतां. हो प्रकार गुंडगिरीचो आसा. मुख्यमंत्र्यांनी हातूंत लक्ष घालचें. केंद्र सरकारांतल्या एका बळिश्ट मनशाच्या तालार सद्या हणजूण पुलीस नाचतात असो आरोप तांणी केलो.
हणजूण पुलिसांनी हें प्रकरण हाताळपाक कळाव आनी चूक केल्या. पुलिसांनी सगल्यांत पयलीं गुन्यांव नोंद करपाची गरज आशिल्ली. आतां पुलिसांनी दोशींक सोदून काडचें. आमचें गोंय पुलिसांचेर निंबून आसा आनी ते पिडीत आगरवाडेकार कुटुंबाक न्याय मेळोवन दितले अशें मायकल लोबो हांणी म्हणलें.
सद्दां पुलीस स्टेशनार आंदोलन: डिलायला
पुलिसांनी रिअल इस्टेट एजंटाक ह्या प्रकरणांत अटक केल्या. एजंटाक अटक करून कांयच फायदो ना. पुलिसांनी दुबावीत पुजा शर्माक अटक करची. बापूय-पुताचें अपहरण केलें तांकां धरचे. आमी पुलिसांक एका दिसाचो वेळ दितात. नाजाल्यार दुबावितांक अटक जायना तो मेरेन आमी सद्दां हणजूण पुलीस स्टेशनार आंदोलन करतलीं अशें आमदार डिलायला लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
