भांगरभूंय | प्रतिनिधी
राशीद खानाच्या फुडारपणाखाला खेळपी अफगाणिस्तान क्रिकेट पंगडान इतिहास घडयलो. अफगाणिस्तानान सुपर आठांतले निमाणे मॅचींत बांगलादेशाक 8 धांवड्यांनी हारोवन पयले खेपे संवसारीक टी-20 सर्तीचे सेमी फायनलींत सुवात मेळयली.
अफगाणिस्तानाच्या ह्या जैतान ऑस्ट्रेलियेचें सर्तींतलें आव्हान सोंपलें. ऑस्ट्रेलियेचो सेमीफायनलींत पावपाचो फुडार हे मॅचीचेर निंबून आशिल्लो. कारण अफगाणिस्तान आनी बांगलादेश हांकां लेगीत सेमी फायनलींत पावपाची संद आशिल्ली. अफगाणिस्तान हारिल्लो जाल्यार ऑस्ट्रेलियेचो सेमी फायनलींत पावपाचो मार्ग मेकळो जातलो आशिल्लो. पूण, अफगाणिस्तान जिखलो आनी ऑस्ट्रेलियेचें आव्हान सोंपलें.
आतां 27 जूनाक त्रिनिदादांत भारताच्या वेळा प्रमाण सकाळीं 6 वरांचेर जावपी वयले सेमी फायनलींत अफगाणिस्तानाचो पंगड दक्षीण आफ्रिके आड खेळटलो. जाल्यार त्याच दिसा रातीं कडेन आठ वरांचेर जावपी दुसरे सेमी फायनलींत भारताचो पंगड इंग्लंडा आड खेळटलो.
मजगतीं, राशीद खानान टॉस जिखून पयलीं बॅटींग करपाचो निर्णय घेतलो. पूण, अफगाणिस्तानाक निर्धारीत 20 ओव्हरींनी 5 विकेटी व्हगडावन 115 धांवड्यो करप शक्य जाल्यो.
रहमानुल्लाह गुरबाजान सगल्यांत चड 43 धांवड्यो केल्यो. मोखीचो फाटलाव करपी बांगलादेशान थारावीक अंतरान विकेटी व्हगडायल्यो. ओपनर लिटन दासान एक बाजू सांबाळून धरिल्ली. पूण, ताका योग्य अशी साथ मेळूंक ना. दासान 49 बॉलांनी नाबाद 54 धांवड्यो केल्यो. बांगलादेशाचो डाव 105चेर सोंपलो.
बांगलादेशान पांच ओव्हरींनी 3 विकेटी व्हगडावन 43 धांवड्यो केल्ल्यो. सेमी फायनलींतली सुवात निश्चीत करपाक ताका सात ओव्हरींनी आनीक 73 धांवड्यांची गरज आशिल्ली. पूण, ताका तशें करप शक्य जालें ना.
अफगाणिस्तानाचो फास्ट बॉलर नवीन उल हकान 18वे ओव्हरींत सेगीत दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
