भांगरभूंय | प्रतिनिधी
तरणाट्यां मदीं मानसीक दुयेंस डिप्रेशन वाडपाक ड्रग्स, धुम्रपान, सोऱ्याचें वेसन, समाज माध्यमांचो अतीरेक वापर, ऑनलायन गेमींग अशीं जायतीं कारणां आशिल्ल्याचें आयज दिश्टी पडटात.
आमच्या देशांत, तातूंत गोंयय आयलें, आजून मानसीक भलायके विशीं फावो तितली जागृताय, समाजीकाय आनी सहसंवेदना समाजांत ना. हाका लागून कोणय खंय सरभोंवतणी मात्सो मानसीक नदरेन हालिल्लो, अस्वस्थ, उदास मनीस दिसलो जाल्यार जायतो लोक तो ‘आल्तेरार’ जाला, ‘पिसो’ जाला अशें म्हणून नावां दवरतात (कलंकीत करतात). हाका लागून मागीर घरचे, कुटूंबीय अश्या लोकांक लिपोवन दवरतात, तांकां वेळारुच मानसीक दोतोरा कडेन वा सल्ला मसलत तज्ञां कडेन व्हरपाक फाटीं फुडें जातात. हाचो परिणाम मागीर ह्यो व्यक्ती पुराय डिप्रेशनांत वचप, तांच्यात जीव दिवपाची भावना वाडोवपी कीड रिगप… अशे प्रकार जातात. चड करुन हें प्रमाण आदीं वयस्क, जाण्टे हांचे मेरेन मर्यादीत आसताले. पूण हालीं भुरगीं, तरणाटे हांकांय शिक्षण, नोकरी, कामाची सुवात अश्या साबार मळांचेर ताणतणाव, सर्त हांकां तोंड दिवचें पडटा. देखून डिप्रेशना सारकें दुयेंस तांकां चड बादीकार जातना दिसता.
जाण्ट्या मनशांक आनीक म्हत्वाच्या कारणाक लागून अशें मनाचें दुयेंस जाता. ते म्हणल्यार येवपी एकलेंपण. कांय कडेन हें एकलेंपण घरचीं, सरभोंवतणचीं मनशां नासप, आसूनय तांचे कडेन संपर्क ना दवरप आदी गजालींक लागून घडटा. कांय कडेन जाण्टीं मनशां मनान खचून स्वयंमग्न कशीं जावन हें एकलेंपण ओडून हाडटात. पण कोणच हें मुद्दाम, बळयां करीना. एकलेंपण हें मुदलांत जाण्ट्यांक बादक. पूण आतां सगले तरेचो लोक सरभोंवतणी आसूनय हें दुयेंस भुरगीं, तरणाटीं हांकां बादूंक लागलां. ‘सायकॉलॉजीकल सायन्स’ ह्या जाॅर्नालांत हालींच प्रसिद्ध जाल्ल्या एका अभ्यासांत एकटेपणाची प्रवृत्ती तरणाटे आनी वयस्कर वय (ओल्डर अॅडल्टहूड) हांतले मनशांत सामकी तेंगशेर वता अशें दिसून आयलां. जाल्यार ही मानसीकताय मध्यम पिरायेच्या व्यक्ती मदीं उणी जातना दिसून येता. देखून संवसारीक भलायकी संघटनेन ‘एकलेंपण’ (लोनलीनॅस) हें संवसारीक भौशीक भलायकी हुस्को म्हणून जाहीर केलां. आमी ह्या गजाली कडेन आडनदर करुंक फावना.
आदीं असले मानसीक विकार फकत चड प्रगतीशील अश्या अमेरिके सारक्या वाठारांनी आसतात असो समज आसलो. आतां आयटीच्या जागतीक संचारान, समाज माध्यमांच्या धुडगुसान, जग हें एक ‘गांव वाठार’ कसो जाला. देखून बऱ्या वांगडा अनिश्ट गजालीय सगल्या वाठारांनी पावतात आनी वेगवेगळ्या कारणांक लागून मूळ धरतात.
तरणाट्यां मदीं मानसीक दुयेंस डिप्रेशन वाडपाक ड्रग्स, धुम्रपान, सोऱ्याचें वेसन, समाज माध्यमांचो अतीरेक वापर, ऑनलायन गेमींग अशीं जायतीं कारणां आशिल्ल्याचें आयज दिश्टी पडटात. तज्ञांच्या म्हणण्या प्रमाण हें एकलकोंडेंपण म्हणल्यार एका खिणाची भावनीक अवस्था न्ही तर एक खर अशी परिस्थिती जाचे जायते गंभीर परिणाम जावं येतात. जशें मानसीक स्वास्थ्य इबाडप, न्हिदेचो इबाड जावप आनी केन्ना केन्ना हांतल्यान जिविताक धोकोय संभवता. जागतीक भलायकी संघटनेन तर एकलेंपण हें एक साथीच्या रोगा प्रमाण फाफसत चल्लां अशी शिटकावणी दिल्या.
एकलेंपण बळावत वता तेन्ना तें मनशाची प्रतिकार शक्त उणी करता, मानसीक आनी करतां करतां कुडीची भलायकी इबाडटा. मानसीक दुयेंसाची वाड करपाक लागता. कारण हो एक प्रकारचो तकलेक ताण. कारण मन चिंतता जें दुस्मान लेगीत चिंतना अशें म्हणटात ते खरें. आनी मन जेन्ना एकलेंपणान घुसपून उरता तेन्ना ताच्या चंचलपण आनी अविचारी विचार करपाक शीम ना मेर!
मनाचे दोतोर सांगतात, एकलेंपणाच्या तणावांतल्यान रक्ताभिसपण समस्या, मागीर उंचेलो रक्तदाब (हायपर टँशन) आनी करतां करतां काळजाचीं दुयेंसां, असो हो प्रवास. सुरवेक एकलेपणांतल्यान मनीस निरशेणी, दुखी जावप, चिंता आनी तणाव अशी वाट चलता. मागीर लांब काळांत भलायकी इबाडपांत, जिणेची परिस्थिती बिगडप आनी कांय फावटी हांतल्यान अकाली मरण ह्योय गजाली घडटात.
तरणाट्यांक कॉलेज सोंपतच नोकरी करपाक वचप सारक्या अवस्थेंत समाजीक अलगीकरण जाणवूं येता. ह्या काळा दरम्यान तरणाट्यांक इश्टांची ताटातूट जावप, नवे सुवातीर अर्थपूर्ण संबंद जुळोवपाक यश येवप ना, अश्या गजालींतल्यान एकलेंपण येवं येता. तेच प्रमाण समाज माध्यम आनी तंत्रगिन्यानाचेर वाडत वचपी विसंबणेक लागूनय मनीस संबंदाच्या बाबतींत अलगावाची भावना वाडत वचूं येता. हें जालें तरणाट्यांच्या बाबतींत. जाण्ट्यां मदीं भलायेकच्यो समस्या, भोंवपा- फिरपाचेर मर्यादा येवप, संज्ञानात्मक तांक उणी जावप, अर्थीक विवंचना, लागींच्या मनशाचें मरण आदी गजालींक लागून तांचे मदीं एकटेपणाची भावना रिगून वाडीक लागू येता. मध्यम वयाच्या वयस्कांक कामाच्या बाबतांत समाजीक संपर्क आसप, कुटूंबीय भोंवतणी आसप आनी समुदाय सहभाग ह्या गजालींक लागून एकलेंपणाची भावनेचो त्रास सहसा जाणवना. मानसीक भलायकेचे तज्ञ डॉ. मधुसूदन सिंह सोळंकी हे शिटकावणी दितात : समाज माध्यम हें प्रत्यक्ष जग आनी अर्थपूर्ण लोक संपर्क ह्या गजालींक केन्नाच पर्याय म्हणून वापरचें न्ही, कारण हाचो परिणाम नेमको उरफाटो जावं येता. एकलेंपण वाडोवप आनी एके तरेची अलगीकरणाची भावना वाडोवप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
