भांगरभूंय | प्रतिनिधी
2.30 लाखाचो हिऱ्याचो हार फारायलो; दोगां आड कागाळ
पणजी: सांतीनेझ हांगासरल्या पीएन गाडगीळ ह्या भांगराच्या शोरुमांत भांगर विकतें घेवपा हेतान आयिल्ल्या दोगां अनवळखी गिरायकांनी 2.30 लाख रुपया मोलाची हिऱ्याची वस्त चोरून व्हेली. ह्या प्रकरणांत पणजी पुलिसांनी अनवळखी गिरायकां आड गुन्यांव दाखल करून तपास सुरू केला.
पणजी पुलिासंनी दिल्ले म्हायती प्रमाण ह्या प्रकरणांत पीएन गाडगीळ भांगरा शोरुमाचे वेवस्थापक योगेश भिडे हांणी कागाळ दाखल केल्या. ते प्रमाण सोमारा 24 वेर दनपारां 1 ते 1.30 मजगतीं दोग अनवळखी गिरायक सांतीनेझ हांगासरल्या पीएन गाडगीळ भांगरा शोरुमांत आयले. उपरांत त्या दोगांनी हिऱ्याच्यो वस्ती विकत्यो घेवपा हेतान कर्मचाऱ्यांक व्यस्त दवरून 2.30 लाख रुपया मोलाचो हिऱ्याचो हार चोरी करून धांव मारिल्ल्याचें कागाळींत म्हणलां.
हाची दखल घेवन पणजी पुलीस निरिक्षक विजयकुमार चोडणकार हांच्या मार्गदर्शना खाला उपनिरिक्षक विराज नायक हांणी दोन गिरायकां आड भारतीय दंड संहितेच्या कलम 380 आनी आरडब्ल्यू 34 खाला गुन्यांव दाखल करून चवकशी सुरू केली.
ह्या प्रकरणांत पुलिसांनी शोरुमांतल्या सीसीटीव्ही कॅमेऱ्याची चित्रफीत तपासणी सुरू केल्या. मजगतीं, पुलिसांक ह्या प्रकरणांत कांय म्हत्वाचे पुरावे सांपडल्यात आनी फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
