भांगरभूंय | प्रतिनिधी
आदलो उपसरपंच केल्फा फर्नांडीसा आड गुन्यांव नोंद
म्हापशें: सांजांव खेळून मॅगी खावपा खातीर गाळ्यार राविल्ले पांच चले, चलयो हांकां सोऱ्याचे घुंवळेंत मारपेट करपा सयत विनयभंगाचो प्रकार बागा-हडफड्यां घडलो. ह्या प्रकरणांत क्लिफुटूस फर्नांडीस उर्फ केल्फा हाचे आड हणजूण पुलिसांनी गुन्यांव नोंद केला.
ही घडणूक सोमारा सांजवेळा 7.30 वरांच्या सुमामराक बागा-हडफड्यां पुला कुशीक घडली. ह्या प्रकरणांत 23 वर्सां पिरायेचें हणजूणचें म्हाविद्यालयीन चलयेन पुलिशेंत कागाळ दाखल केल्या. कागाळदार तरणाटी ही इश्ट इश्टिणी सयत बागा कळंगूटे नाकरी रिसॉर्टांत आयोजीत केल्ल्या सांजांव कार्यावळीक गेल्ली. थंय सावन हो सात जाणांचो पंगड घरा वतालो.
हे सगले जाण हडफड्यां पुला कुशीक पावले उपरांत थंयच्या एका गाळ्याचेर मॅगी खावपा खातीर रावले. ह्या वेळार दुबावीत आरोपी केल्फा थंय आयलो. तो सोऱ्याचे घुंवळेंत आशिल्लो. ह्या पंगडा कडेन ताणें वाद घालो. कागाळदार चलयेचो विनयभंगा करून लेस्टर, रेगन, डॅरेक, अॅलन, केदन ह्या कागाळदार चलयेच्या इश्टांक ताणें मारपेट केली आनी उपरांत थंयच्यान पळ काडलो.
घडणुकेची म्हायती मेळटकूच हणजूण पुलीस घडणूक थळार दाखल जाले. जखमींचेर हॉस्पिटलांत उपचार केले उपरांत रातीं उसरां दुबावीत आरोपी क्लिफुटूस फर्नांडीस उर्फ केल्फा हाचे आड भादंसंच्या 354, 323, 352 आनी 504 कलमां खाला गुन्यांव दाखल केला.
दुबावीत आरोपी केल्फा हो हडफडें-नागवाचो आदलो उपसरपंच आसून सद्या तो फरारी आसा. ताचो सोद पुलीस घेतात. फुडलो तपास पुलस उपनिरिक्षक नितेश शिंगाडी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
