भांगरभूंय | प्रतिनिधी
संसदे भायर वेंचणूक जाले उपरांत संसदे भितर वेंचणुकेची चर्चा सुरू
नवी दिल्ली, खबरां संस्था: प्रधानमंत्री नरेंद्र मोदी हांच्या तिसर्या कार्यकाळाक सुरवात जाल्या. ४ जुनाक निकाल जाहीर जाले उपरांत कांय दिसांनी प्रधानमंत्री नरेंद्र मोदी सयत ७१ खासदारांनी सोपूत घेतलो. आतां संसदेच्या पावसाळी अधिवेशनाच्या पयल्या टप्प्यांत नवे वेंचून आयिल्ले सगळे खासदार सोपूत घेतात. देशभरांतल्या खासदारांचो सोपूत घोवपाचो सुवाळो सुरू आसतना दुसरे वटेन स्वतंत्र भारताच्या इतिहासांतली पयली घडणूक ह्याच अधिवेशनांत पळोवपाक मेळटली. मोदी सरकाराच्या तिसर्या कार्यकाळाच्या पयल्या अधिवेशनांत सत्ताधारी पक्ष आनी विरोधी पक्ष हांचे मदीं मतभेद जाल्ल्यान परिणाम म्हणून ह्यो घडणूको घडटात अशें दिसता.
दिल्लीक अशें कितें घडटा?
मोदीच्या तिसर्या कार्यकाळाचें पयलें अधिवेशन राजधानी दिल्लींत चालू आसा. एके वटेन खासदारांचो सोपूत घेवपाचो सुवाळो सुरू आसा आनी दुसरे वटेन लोकसभेच्या अध्यक्षपदा विशीं व्हड चर्चा सुरू आसा. भाजपाच्या फुडारपणा खाला आशिल्ल्या एनडीएंत आदले अध्यक्ष ओम बिर्ला हांच्या नांवा विशीं एकमत जालां हें स्पश्ट जालां. पूण ओम बिरलाच्या नांवाचेर सत्ताधारी पक्ष आनी विरोधकांचें एकमत जावंक ना. इंडिया आघाडेन लोकसभेच्या उपाध्यक्ष पदाचेर (उपसभापती) दावो केलो. तशेंच सत्ताधारी पक्ष आनी विरोधी पक्ष हांचे मदीं चर्चा जाली. पूण एकमत जावंक शकलें ना.
सत्ताधारी उपाध्यक्षपदाची मागणी मान्य करिनाशिल्ल्यान निमाणें इंडिया आघाडीच्या फुडार्यांनी लोकसभा अध्यक्षपदाचे वेंचणुकेंतूच उमेदवार उबो करपाचो निर्णय घेतलो. ते प्रमाण केरळाचो कॉंग्रेस खासदार कोडिकुन्निल सुरेश हांकां उपाध्यक्षपदा खातीर उमेदवारी दिल्या. हे फाटभुंयेर संसदेंतल्या सगळ्यांत उंचेल्या पदाचे वेंचणुकेंत आतां व्हड सर्त निर्माण जाल्या.
अध्यक्ष पदाची वेंचणूक पयलेच खेपे जातली!
आतां मेरेनचो स्वतंत्र भारताचो इतिहास पळयल्यार हे खेपे लोकसभा अध्यक्षपदाची वेंचणूक पयलेच खेपे जातली हें निश्चीत आसा. आतां मेरेन लोकसभा अध्यक्षपदाचेर आशिल्ल्यांचें नांव सत्ताधारी पक्षांचे संमतीनूच थारायताले आनी ती जापसालदारकी त्या खासदाराचेर सोंपयताले. राज्यकर्त्यांचो हो निर्णय विरोधकांनीय मान्य केलो. अंदूं मात विरोधकांनी उपाध्यक्षपदाची मागणी मान्य नाशिल्ल्यान आतां संसदे भायर वेंचणूक जाले उपरांत संसदे भितर वेंचणुकेची चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
