भांगरभूंय | प्रतिनिधी
जायत्या जाणांची दिसाची सुरवात ही च्यान जाता. तशेंच कामाचो ताण वा थकवो आयलो जाल्यार ताचेर च्याय बरो उपाय मानतात. भारतांत च्या मोगी खूब आसात. पूण तुमकां खबर आसा, ल्हान भुरग्यांक च्या पियेवंक दिवची कांय ना? भुरग्यांक च्या दिवप भलायकेक हानीकारक आसा काय? तशेंच भुरग्यांक खंयच्या पिरायेचेर च्या पियेवंक दिवची?
भुरगीं व्हडल्या लोकांक च्या पियेतना पळोवन च्या पियेवपाचो हट्ट करतात. मागीर तांका च्या पियेवपाक दिता. पूण च्याची संवय भुरग्यांक हानीकारक थारता. भुरग्यांक एका खाशेल्या पिराये उपरांतच च्या दिवची. च्याचो तांचे भलायकेचेर वायट परिणाम जाता. शारिरीक भलायके वांगडाच च्याचो तांचे मानसीक भलायकेचेरूय परिणाम जाता. च्यात मेळपी कॅफीन भुरग्यांचे भलायके खातीर हानिकारक आसता. तशेंच तातूंतली साकर भुरग्यांचे भलायके खातीर बरी न्हय.
भलायकी तज्ञांच्या म्हणण्या प्रमाण, 12 वर्सां सकयल्या भुरग्यांनी च्या पियेवंक फावना. कारण ह्या पेयां मदीं कांय घटक आसतात जे भुरग्यांचे भलायकेचेर नकळत वायट परिणाम करपाक शकतात. भुरग्यांच्या आंगांत कॅल्शियम आनी लोखणाचें प्रमाण उणें जाता. ताका लागून हाडां भंगुर जातात आनी साकर चड आशिल्ल्यान दांतांकय लुकसाण जावपाची शक्यताय आसता.
12 वर्सां वयर पिरायेच्या भुरग्यांक च्या पियेवंक मेळटा. 12 ते 18 वर्सां पिरायेच्या भुरग्यांनी एका दिसांत 100 मिलीग्रामां परस चड च्या पियेवची न्हय. प्रमाणा परस चड च्या पियेल्यार भलायकेक गंभीर धोके निर्माण जावंक शकतात. किरकीर, पिरपीर करप, न्हीद उणी जावप, डिडायड्रेशन आनी गोडेंमूत सारकिल्ल्यो समस्या निर्माण जावंक शकतात. देखून ल्हान भुरग्यांक च्यावेची संवय लावचे पयलीं ह्या सगळ्या गजालींचो विचार करचो. च्यावेच्या बदलाक भुरग्यांक दूद दिवप चड फायद्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
