भांगरभूंय | प्रतिनिधी
बीजींग, खबरां संस्था: चीनाचे चंद्र मोहिमेचें यान चंद्राच्या पृष्ठभागा वयल्यान माती घेवन निमाणें आयज धर्तरेर पावलें. चंद्राच्या काळखी वाठारांतल्यान मातयेचे नमुने हाडपाक येस मेळोवपी हो पयलो देश. चीनी नॅशनल स्पेस ऍडमिनिस्ट्रेशनचे चांगई-६ लँडर कॅप्सुलांत नमुने घेवन ५३ दिसांनी धर्तरेर पावलें.
चीनान ३ मेक चांगई- ६ मिशन लॉंच केलें. न्युयॉर्क टायम्सच्या म्हणण्या प्रमाण, चंद्राच्या सगळ्यांत पयसुल्ल्या भागात (जंय काळोख आसा) वचून नमुने एकठांय करून ते धर्तरेर धाडप हे तपासणेचें लक्ष्य आशिल्लें. आतां चीनान २०३० मेरेन चंद्राचेर मनीस धाडपाचें लक्ष्य दवरलां. हें मिशनूय त्याच लक्ष्याचो एक भाग.
आतां मेरेन चंद्रार गेल्ल्यो सगळ्यो १० चांद्रमोहिमो फकत लागींच्या भागात (जो आमकां दिसता) पावल्यात. हातूंत भारत आनी अमेरिकेचोय आसपाव आसा. अशे परिस्थितींत पयसुल्ल्यान नमुने हाडून चीनान अंतराळ सर्तींत अमेरिकेक आव्हान दिलां.
संशोधन तळ उबारपाचें आसा
Chang’e-6 चें री- एंट्री मॉड्यूल मंगळारा सकाळीं ११: ३० वरांचेर (भारतीय वेळा प्रमाण) चीनाच्या उत्तर भागांत देंवलें. उपरांत कांय मिनटांत शोध पंगड ह्या मॉड्यूल मेरेन पावलो. हे मोहिमेच्या येसा विशीं चीनी शास्त्रज्ञांनी म्हायती दिली.
हे मोहिमेचें येस चीनाचें सपन पुराय करपा खातीर मोलाचो वांटो थारतलें, अशें राष्ट्राध्यक्ष शी जिनपिंग हांणी सांगलें. हाचे वरवीं चीन स्वताक स्पेस पॉवर करपाच्या लागीं पावलां. मनीस धाडपा वांगडा चीन २०३० मेरेन चंद्राच्या दक्षीण ध्रुवाचेर संशोधन तळ उबारपाचें आसा अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
