भांगरभूंय | प्रतिनिधी
दोग सुण्यांचो घेतलो जीव: लोकां मदीं पातळ्ळां भंय
फोंडें, प्रतिनिधी: बेतोडा पंचायत वाठारांतल्या निरंकाल गांवांत फाटल्या कांय दिसां सावन बिबटो भोंवता. हाका लागून नागरिकां मदीं भंय पातळ्ळा. बिबट्यान सोमारा सांजेवेळार गवळवाड्यावेल्या पास्कोल राॅड्रीग्ज हांच्या घरांतल्या पोशिल्ल्या सुण्याचेर हल्लो करून ताका जखमी केलो. हेर तीन पोशिल्ल्या सुण्यांनी बिबट्याचेर झोपय घाल्ल्यान ताणें थंयच्यान पळ काडलो. मात मंगळारा परत बिबटो घरा लागसार आयिल्ल्यान ह्या वाठारांत भंयाचें वातावरण पातळ्ळां. बिबट्याचेर हल्ल करपी तीन सुण्यां मदलो एकलो जखमी जाला.
बिबट्यान पोशिल्ल्या सुण्याक जखमी केल्ल्याची म्हायती पास्कोल राॅड्रीग्ज हांणी रान कर्मचार्यांक दिल्ली. मात मंगळारा सांजवेळ जाली तरी कर्मचार्यांनी ह्या वाठारांत पळोवणी करूंक नाशिल्ल्यान थळाव्यांनी तिडक उक्तायल्या.
फाटल्या कांय दिसां सावन निरंकाल हांगच्या कोणसे, सांतेरीमळ, गवळवाडो, शिगणेव्हाळ आनी मायणे वाठारांतल्या घरांनी पोशिल्ल्या सुण्यांची बिबटो येवन शिकार करता.
गवळवाड्यावेल्या पास्कोल राॅड्रीग्ज हांच्या घरांतलो एक कांय दिसां आदीं बिबट्यान व्हेल्लो. तांचेर ६ सुणे आसात. तांतल्या दोगां सुण्यांक बिबट्यान पयलींच मारल्यात. सोमारा जखमी केल्ल्या सुण्याचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
