भांगरभूंय | प्रतिनिधी
मुरगांव, प्रतिनिधी: मुरगांव पालिकेच्या वास्को भाजी मार्केटांतले वेवसायीक आपलो वेवसाय सरळ रस्त्यार येवन करतात. हाका लागून वाहन चालकां वांगडा चलत वचप्यांक बरेच त्रास सोंसचे पडटात. हे विशीं पालिकेच्या अधिकार्यांक म्हायती मेळटांच तांणी रस्त्यार येवन विक्री करतल्यांचेर कारवाय केली. तशेंच भाजी मार्केटांत केल्लें अतिक्रमण काडलें. हाचे फुडेंय पालिके वरवीं अतिक्रमणा आड खर कारवाय चालूच उरतली अशें नगराध्यक्ष गिरीश बोरकार हांणी सांगलें.
वास्को तात्पुरतो उबारिल्ल्या मुरगांव पालिकेच्या नुस्तें मार्केटा मुखारच्या फळ, भाजी विक्रेत्यांनी व्हडा प्रमाणांत अतिक्रमण केल्ल्यान वाहन चालकांक खुबूच त्रास सोंसचो पडटा. तशेंच टिबी कुन्हा चौकांत पालिकेच्या मार्केटांत दुकान मालकांनी केल्लें अतिक्रमण काडलें. मुरगांव पालिकेच्या वरिश्ठ अधिकार्यांक अतिक्रमणाची म्हायती मेळटांच पालिका निरीक्षक योगेश देसाय आनी प्रकाश कादरी हांणी कारवाय करून नुस्तें मार्केटांत वचपी रस्तो मेकळो केलो.
तशेंच नुस्तें मार्केटांतल्यान टिबी कुन्हा चौकांत वचपी रस्त्यार केल्ल्या अतिक्रमणाचेरूय पालिकेन कारवाय केली. ह्या रस्त्याचे दोनूय वटेन फूल विक्रेत्यांनी केल्लें अतिक्रमण पालिकेच्या कामगारांनी काडलें. फुडेंय मुरगांव पालिके वरवीं फळ, भाजी मार्केटांत करपी अतिक्रमणा आड कारवाय करतले. तशेंच शारांतल्या रस्त्यांचेर रावून वेवसाय करप्यांचेरूय खर कारवाय करतले अशी म्हायती नगराध्यक्ष गिरीश बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
