भांगरभूंय | प्रतिनिधी
नवी दिल्ली, खबरां संस्था ः आयच्यान (25 जून) वट्ट 96 हजार कोटी रुपयां परस चड मोलाची स्पॅक्ट्रम पावणी (Spectrum Auction) सुरू जातली. दूरसंचार मळा वयले रिलायन्स जियो, भारती एअरटेल, वोडाफोन-आयडिया ह्यो कंपनी पावणी प्रक्रियेंत एकामेकां कडेन सर्त करतल्यो. सध्या देशभर सुरू जावपी 5 जी मोबायल सेवां खातीर वयली दरेक कंपनी ही स्पॅक्ट्रम पावणी मेळोवपा खातीर यत्न करतात. हाचे आदीं स्पॅक्ट्रम पावणी प्रक्रिया ऑगस्ट 2022 वर्सा जाल्ली. हे प्रक्रियेंत पयलेच खेपे 5 जी सेवे खातीर (5 जी इंटरनॅट) स्पॅक्ट्रम पावणेचो आस्पाव केला.
आतां केंद्र सरकार 96,317 कोटी रुपयांच्या येणावळीच्या अपेक्षे सयत वट्ट 8 स्पॅक्ट्रम बँडांत पावणी करपाचें आसा. हे पावणेंत 800 मेगाहर्ट्झ, 900 मेगाहर्ट्झ, 1800 मेगाहर्ट्झ, 2100 मेगाहर्ट्झ, 2300 मेगाहर्ट्झ, 2500 मेगाहर्ट्झ, 3300 मेगाहर्ट्झ आणि 26 गीगाहर्ट्झ अश्या स्पॅक्ट्रम पावणेचो आस्पाव आसा.
रिलायन्स जियो वांटो घेतली
हे पावणेंत रिलायन्स जियोय वांटो घेवपाची आसा. हे खातीर जियोन सरकारा कडेन आगाऊ ठेवी म्हूण सुमार 3000 कोटी रुपया जमा केल्यात. दूरसंचार खात्यान दिल्ले म्हायती प्रमाण, भारती एअरटेल कंपनीन 1050 कोटी रुपया, वोडाफोन आयडिया कंपनीन 300 कोटी रुपया आगाऊ ठेवी जमा केल्यात. दूरसंचार कंपनींच्या आगाऊ रकमेचेर आदारून ह्या कंपनींचे फुडाराचे रणनितीचो अदमास करूं येता. देखून हे पावणी प्रक्रियेंत जियो एअरटेल व्हडली बोली लावपाची शक्यताय आसा. रिलायन्स जियो वट्ट स्पॅक्ट्रम मोलाच्या 37.36 टक्के, भारती एअरटेल 13.07 टक्के आनी वोडाफोन आयडिया 3.73 टक्के बोली लावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
