विरोधी पक्षाचें नवें आव्हान !

भांगरभूंय | प्रतिनिधी

अठरावे लोकसभेच्या वेंचणुकेंतल्या निकालान सरकार आनी घटमूट विरोधी पक्ष ह्या दोगांनीय संसदेच्या महान परंपरांचें पुनरुज्जिवन करपाची संद दिल्या, आनी ती सादप हेंच देशाच्या फायद्याचें आसा.

अठरावे लोकसभेचें पयलें अधिवेशन काल सोमारच्यान सुरू जालें. नव्या सभाघरांत वेंचून आयिल्ल्या वांगड्यांक सोपूत दिवपाक पयले दोन दीस वतले, आनी नव्या सभापतींची निवड तशेंच राष्ट्रपती द्रौपदी मुर्मू हांचें अभिभाशण जाले उपरांत नव्या लोकसभेच्या कामकाजाक खऱ्या अर्थान सुरवात जातली, तरी तीन जुलय मेरेन चलपी पयल्या सत्रा कडेन देशांतल्या लोकांचे लक्ष लागून उरलां हातूंत दुबाव ना. ताका कारणांय तशींच आसात, आनी तातूंतलें पयलें कारण अशें, सुमार 10 वर्सांच्या काळा उपरांत प्रधानमंत्री नरेंद्र मोदी हांच्या सरकाराक आव्हान दिवपा खातीर एक समर्थ असो विरोधी पक्ष मुखार आयला. सोळावे आनी सतरावे लोकसभेंत विरोधी पक्षाचे अस्तित्व नांवापुरतेंच आशिल्लें. तशें पळोवंक गेल्यार विरोधी पक्ष गायबूच आशिल्लो अशेंय म्हणूंक येतलें. सुमार धा वर्सां लोकसभेंत विरोधी पक्ष फुडारीय नाशिल्लो हाचो विचार केल्यार सत्ताधारी पक्षाचेर अंकूश असो नाशिल्लोच. आनी सांसदीय लोकशायेंत विरोधी पक्ष फुडारी नासत जाल्यार सरकारूय कशें गतीन सुट्टा हाचो अणभव आमी सगलेच फाटलीं धा वर्सां घेत आसात. अशे फाटभुंयेर सरकारा मुखार असो विरोधी पक्ष उबो रावप ही काळाची गरज आशिल्ली आनी अठरावे लोकसभेंत हें सगलें जुळून आयिल्ल्यान सरकार आनी विरोधी पक्षाकूय आपल्यो जबाबदाऱ्यो सांबाळूनच काम करचें पडटलें. प्रधानमंत्री नरेंद्र मोदी हांणी आपल्या तिसऱ्या कार्यकाळांत विरोधकांक कस्पटा समान लेखून आपल्याक जाय तेंच करपाचो हट्टाहास मुखार व्हरूंक जमचेंच ना, पूण विरोधकांक विस्वासांत घेवनूच सरकार चलोवचें पडटलें.
सभाघरांत आतां दोनूय वटानचें बलाबल सुमार सारकेंच आशिल्ल्यान म्हणात वा प्रधानमंत्री नरेंद्र मोदी हांचे कडेन आपलें स्वताचें अशें भोवमत नाशिल्ल्यान विरोधकांची मर्जी सांबाळूनच तांकां मुखार वच्चें पडटलें. आनी हातूंत खूबशे फावटी सरकार आनी विरोधकां मदीं संघर्श जातलोय बी. तरी विरोधकांनी विरोधा खातीर विरोध हो आपलो पोरणो मंत्र सोडून विधायक विरोधाचें प्रदर्शन करपाची ह्या वेळार जी संद मेळ्ळ्या ती तांणी व्हगडावची न्हय. काँग्रेस पक्षाच्या फुडारपणा खाला इंडी आघाडी आयजूय भाजपाचें केंद्रांतलें सेगीत तिसरें जैत मान्य करिना आनी भाजपाची ही हारूच आशिल्ल्याचो दावो सेगीत करतना दिसता. पूण वास्तव स्विकारून विरोधकांनी एकसंघ रावन मुखार वच्चें पडटलें. राहूल गांधी वा इंडी गटबंधनांतले हेर फुडारी नरेंद्र मोदी हांचें सरकार चड काळ तिगचें ना असो दावो सेगीत करतना दिसतात. पूण आयचे घडयेक निदान प्रधानमंत्री नरेंद्र मोदी हांचें सरकार अडचणींत येवपाची मात लेगीत शक्यताय ना. अशे परिस्थितींत विरोधकांनी मोदी दुस्वास कुशीक दवरून देशा खातीर म्हत्वपूर्ण आशिल्ल्या मुद्यांचेरूच सरकाराक सामकार वचपाची गरज आा. पूण राहूल गांधी आनी हेर विरोधी फुडाऱ्यांची देहबोली पळयत जाल्यार अवास्तव मुद्यां वेल्यान विरोधक आक्रमक जातना दिसूंक लागला. विरोधकां कडेन आतां बरी वांगड्यांची संख्या आसा हें मान्य करुनूय हंगामी सभापतींची जाल्ली नेमणूक आनी हेर किरकोळ मुद्यां वेल्यान तांणी आक्रमक जावपाची तशें पळोवंक गेल्यार गरज नाशिल्ली. इतिहासा कडेन पळयत जाल्यार काँग्रेस फुडाऱ्यांक आपल्याच पक्षान अशा प्रकरणांत घेतिल्ल्या निर्णयांची म्हायती मेळपाची. विरोधकांनी आयज नमनाकूच संसदे भायर एकठांय येवन लाक्षणीक निशेध केल्ल्यान सरकाराक तांणी स्पश्ट संदेश दिला अशेंय म्हणूं येतलें.
नव्या लोकसभेच्या पयल्या सत्रांत सुरवात जावचे पयलींच मोदी सरकार आनी विरोधी आघाडी हांचे मदीं हंगामी सभापतींचे नेमणुके वेल्यान एकामेकां मुखार उबे रावतात ते आमी पळयतात, ताचे वेल्यान प्रत्यक्ष सभाघरांत विरोधक तांकां नव्यान मेळिल्लें संख्याबळ सरकाराक दाखोवन दिवपा खातीर खंयच्याय थराक वचूंक शकतात अशें दिसप सहाजिकूच आसा. पूण विरोधकांनी संयमान सरकाराक घेरचें हीच सगल्यांची अपेक्षा. लोकसभेच्या हंगामी सभापतींक सहकार्य करपा खातीर विरोधी पक्षाच्या फुडाऱ्यांची सभापतींच्या पॅनलांत नेमणूक केली तेन्ना ह्या पॅनलांत काम करपाचें ना ही जी भुमिका विरोधी आघाडीन घेतल्या, ताचे वेल्यान सरकारा कडेन फक्त संघर्श करपाचें विरोधकांनी थारायिल्ल्याचें दिसून येता. पूण हें सगलें विरोधकांनी टाळपाची गरज आशिल्ली. सरकाराक जंय सहकार्य करूंक येतलें तितलें करून तात्वीक वा देशहिताच्या मुद्यांचेर तडजोड करपाची ना हीच भुमिका घेवनूच विरोधकांक मुखार वच्चें पडटलें. राहूल गांधी हांचो मोदी दुस्वास तसो जगजाहीर आसा. नरेंद्र मोदी हांच्या सोपूत सुवाळ्याचेर बहिश्कार तशेंच तांचे सादें अभिनंदन करपाचेंय तांणी टाळप हातूंतल्यान खूबश्यो गजाली स्पश्ट जातात.
लोकशाय सांबाळून दवरपाच्यो गजाली करप्यांनी लोकशाये कडेन संबंदीत आचार-विचार, आदर्श हाका पाळो दिवपाची अपेक्षा आसता. पूण तशें जातना दिसून येना. निामणें काँग्रेसी कडेन धा वर्साच्या काळा उपरांत विरोधी पक्षफुडारीपद आयलां. राहूल गांधी विरोधी पक्षफुडारीपद स्विकारतले काय ना हें अजून स्पश्ट जाल्लें ना. पूण हें घटनात्मक पद तांणी स्विकारलेंच जाल्यार सगल्यांत पयलीं तांकां आपलो मोदी दुस्वास कुशीक दवरचो पडटलो. इंडी आघाडीतले हेर विरोधी पक्ष राहूल गांधी हांचे बरोबर अशेंच भरकटत वतले काय कितें होवूय तितलोच म्हत्वाचो मुद्दो आसा.
नव्या लोकसभेचें सत्र सुरू जातना प्रधानमंत्री नरेंद्र मोदी हांणी लेगीत विरोधकां कडल्यान पुराय सहकार्याची अपेक्षा केल्या. देशांतल्या लोकांक विरोधकांचे फक्त नखरे, नाटकबाजी वा घोशणा नाकात जाल्यार देशहिताचो विचार करपी एका जबाबदार, समर्थ विरोधी पक्षाची देशाक गरज आसा अशें सांगतना लोकशायेचो मान राखपा खातीर ते सरकाराक सहकार्य करतले अशी आस्तूय प्रधानमंत्र्यांनी उक्तायली. 234 वांगड्यांच्या संख्याबळाक लागून विरोधी पक्षांची एकूण उमेद वाडल्या हें समजुपा सारकें आसलें तरी सरकाराच्या मार्गांत कायम आडकाठी जावन रावपाकूच तांणी आपली पुराय शक्त फुकट घालिनासतना राष्ट्रहिताच्या मुद्यांचेर सरकाराक सहकार्य करपाचीय मनाची तयारी तांकां दवरची पडटली. नीट परिक्षेंतलो गोंदळ, रद्द जाल्ली परिक्षा, बेरोजगारी आदीं विशय विरोधकांच्या रडाराचेर आसून नवें संख्याबळ मेळिल्ल्या विरोधकां कडेन थेट संघर्श करिनासतना तांकां कशें शांत करूं येतलें हाचेर सरकाराक विचार करचो पडटलो. राहूल गांधी आनी हेर कांय विरोधी फुडाऱ्यांचो सद्याचो नेट पळयत जाल्यार सरकारा कडेन दोन हात करपाक तांचे हात शिवशिवल्यात अशेंच चित्र दिसता. नव्यान मेळिल्ल्या संख्याबळाचो वापर विरोधकांनी बरीक मुद्यां वेल्यान सभाघराचें कामकाज आडावपा खातीर करचो न्हय. जाल्यार संवादान उपाय काडपाचेर सरकाराक मजबूर करपाक तांणी आपलो वांटो उबारचो हीच आयज तांचे कडल्यान देशाक अपेक्षा आसा. अठरावे लोकसभेच्या वेंचणुकेंतल्या निकालान सरकार आनी घटमूट विरोधी पक्ष ह्या दोगांनीय संसदेच्या महान परंपरांचें पुनरुज्जिवन करपाची संद दिल्या, आनी ती सादप हेंच देशाच्या फायद्याचें आसा.

वामन प्रभू
9823196359