भांगरभूंय | प्रतिनिधी
भांगरभूंय । प्रतिनिधी
पणजीः आपल्या तिसऱ्या कार्यकाळांत लेगीत गोंयच्या सर्वांगी उदरगती खातीर पुराय आदार दिवपाची हमी प्रधानमंत्री नरेंद्र मोदी हांणी आपल्याक दिल्या. ताका लागून फुडल्या काळांत गोंयचे उदरगतीचो नेट आनीक वाडटलो, अशी हमी मुख्यमंत्री डॉ. प्रमोद सावंत हांणी सोमारा ‘भांगरभूंय’ कडेन उलयतना दिली.
जीएसटी कावंसील बसका तशेंच अर्थसंकल्पाच्या निमतान केंद्रीय अर्थमंत्री निर्मला सीतारमण हांचे भेटी उपरांत मुख्यमंत्री डॉ.सावंत हांणी प्रधानमंत्री मोदीं सयत विवीध केंद्रीय फुडाऱ्यांची भेट घेवन तांकां परबीं दिलीं. प्रधानमंत्री मोदी हांचे वांगडा जाल्ले बसकेंत गोंयांतल्या उदरगतीच्या प्रकल्पां विशीं चर्चा जाली. गोंयांतले हजारांनी कोटींचे प्रस्तावीत प्रकल्प ह्या कार्यकाळांत फुडें व्हरून ते बेगिनात बेगीन पिराय करतले. सध्या गोंयांत चालू आशिल्ल्या उदरगतीच्या कामांक गती दितले, गोंय आनी गोंयकारांचे उदरगती खातीर राज्य सरकाराक जाय ती सगळे तरेची मजत केंद्र सरकारा कडल्यान दितले, अशें आस्वासन आपल्याक प्रधानमंत्री मोदी हांणी दिलां. फाटल्या दोन कार्यकाळांत प्रधानमंत्री नरेंद्र मोदी हांणी गोंयचे उदरगती खातीर गरजे प्रमाण निधी दिला. ताकाच लागून 10 वर्सांच्या काळांत गोंयांत हजारांनी कोटींचे प्रकल्प उबे रावल्यात. केंद्रांत आनी गोंयांत भाजपाचें डबल इंजीन सरकार आशिल्लें. ताका लागून चडांत चड केंद्रीय निधी गोंयांत हाडप शक्य जालें. फुडल्या काळांत लेगीत गोंयचे उदरगती खातीर गरजेचो निधी दिवपाक प्रधानमंत्री मोदी निश्चीत पुराय मजत करतले, असो ठाम विस्वास लेगीत मुख्यमंत्री डॉ. सावंत हांणी उक्तायलो.
केंद्रीय मंत्र्यांच्यो घेतल्यो भेटी
दिल्ली भोंवडेंत मुख्यमंत्री डॉ. प्रमोद सावंत हांणी केंद्रीय भलायकी मंत्री जे. पी. नड्डा, रस्ते येरादारी मंत्री नितीन गडकरी, रेल्वे मंत्री अश्विनी वैष्णव, कृशीमंत्री शिवराजसिंग चौहाण, पर्यावरणमंत्री भुपेंद्र यादव हांच्योय भेटी घेतल्यो. केंद्रीय अर्थमंत्री निर्मला सीतारमण हांचे वांगडा जाल्ले बसकेंत मुख्यमंत्री डॉ. सावंत हांणी गोंयचे उदरगती खातीर केंद्रा कडल्यान सुमार 8 हजार कोटींचो निधी मागलो. ह्या निधीचो मुळाव्यो साधन सुविधा तशेंच रेल्वे, कृशी, वीज हांच्या साधनसुविधांत वाड करपा खातीर करतले, अशें मुख्यमंत्र्यान स्पश्ट केलें. मुख्यमंत्री आनी पर्यावरण मंत्री आलेक्स सिक्वेरा हांणी केंद्रीय पर्यावरण मंत्री भुपेंद्र यादव हांची भेट घेतली. हे भेटींत गोंयांतली रेंव काडप, मीन येरादारी हे संबंदांत चर्चा केली.
काँग्रेस काळांतूच संविधान आशिल्लें धोक्यांत
एनडीए सरकाराच्या काळांत भारताचें संविधान धोक्यांत आशिल्लें, असो दावो विरोधी पक्षांनी परतून एकदां सुरू केला. हे विशीं दिल्लींत पत्रकारांनी मुख्यमंत्री डॉ. प्रमोद सावंत हांकां विचारलें, तेन्ना तांणी सांगलें, काँग्रेसीच्या काळांतूच भारतीय संविधान धोक्यांत आशिल्लें. प्रधानमंत्री नरेंद्र मोदी हांच्या काळांत सगळ्यांची उदरगत जाल्या, अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
