भांगरभूंय | प्रतिनिधी
मडगांव: फातोड्डें सावन पणजे वता आसतना पुलीस म्हासंचालक जसपाल सिंग हांकां वाटेर दोन दुचाकी चालक नेमांक पाळो दिनाशिल्ल्याचें दिसून आयलें. तांणी मायणा कुडटरी पुलिसांक त्या दुचाकींचें क्रमांक कळीत केले. उपरांत पुलिसांनी दोनूय दुचालकांचेर दंडात्मक कारवाय करून 16 हाजर रुपयांचो दंड वसूल केलो.
पुलीस म्हासंसालक जसपाल सिंग हे सोमारा सांजवेळा आर्ले सर्कल फातोड्डें सावन नुवें बायपासान पणजे वताले. त्या वेळार बायपासार एक दुचाकी चालक हॅल्मेट घालिनासतना दुचाकी चलयत आशिल्ल्याचें तांकां दिसून आयलें. तशेंच आनीक एक सान पिरायेचो भुरगो हॅल्मेट घालिनासतना दुचाकी चलयत आशिल्ल्याचें तांकां दिसून आयलें. पुलीस म्हासंचालक जसपाल सिंग हांणी दोनूय दुचाकींचें क्रमांक नोंद करून घेतले, आनी ताची म्हायती कारवाये खातीर मायणा कुडटरी पुलिसांक दिली.
पुलीस निरिक्षक अरूण गांवस देसाय हांच्या मार्गदर्शना खाला मायणा कुडटरी पुलिसांनी नेमांक पाळो दिनासतना दुचाकी चलोवपी दोनूय चालकांचेर कारवाय केली. हॅल्मेट घालिनासना, लायसन नासतना दुचाकी चलोवपी भुरग्याच्या पालकांकूय पुलिसांनी आपोवन घेतले. तांकां 13 हजार रुपयांचो दंड दिलो. जाल्यार दुसऱ्या एका हॅल्मेट घालिनासतना दुचाकी चलोवप्याक 3 हजारांचो दंड दिलो. नेमांक पाळो दिनासतना भोंवपी दुचाकी चालकांचेर पुलिसांचें लक्ष आसता, ताका लागून नेमांक पाळो दियात असो संदेशूच हे कारवायेंतल्यान पुलिसांनी दिलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
