भांगरभूंय | प्रतिनिधी
दुबावीत आरोपी लेनी सिमॉयशाक अटक
भांगरभूंय । प्रतिनिधी
म्हापशें: शिरसय टॅक्सी चालकाचेर प्रवाशान चाकू हल्लो केलो. ह्या प्रकरणांत कोलवाळ पुलिसांनी लेनी पीटर सिमायश (60) हाका अटक केली. जाल्यार ह्या हल्ल्यांत चालक सुभाष सावंत जखमी जाला. मानसीक तणावांतल्यान वा चोरयेच्या हेतून हो हल्लो जाल्लो आसपाक जाय, असो दुबाव पुलिसांनी उक्तायला.
ही घडणूक सोमारा सकाळीं 8.45 वरांच्या सुमाराक शिरसय पंचायत घरा कडेन घडली. म्हापशें टॅक्सी स्टॅण्डा वयल्यान फिर्यादी सुभाष सावंत आपले प्रीपेड टॅक्सी (जीए 03 एन 9403) गाडयेन दुबाविताक घेवन अस्नोडयां वतालो. आपल्याक महिंद्रा क्लब हॉटेला कडेन वचपाक जाय अशें सांगून दुबावितान ही टॅक्सी आरक्षीत केल्ली. ह्या प्रवासा खातीर 900 रुपया भाडें थारिल्लें.
गाडी शिरसयच्य पंचायत घरा कडेन पावताच दुबावितान आपलो एक वांगडी येवपाचो आसा, अशें सांगून गाडी थारायली. ते उबरांत दुबावितान फिर्यादीचे तकलेर चाकवान हल्लो केलो. दुबावीत फाटल्या सिटाचेर बशिल्लो. तकलेर कितें तरीं बसलें म्हूण ताणें फाटल्यान वळून पळयलें तेन्ना ताच्या कपलार मूठ मारली.
फिर्यादीन कशी तरी दुबाविताचे तावडेंतल्यान आपली सुटका केली आनी गाडयेंतलो भायर येवन रस्त्यार पडलो. ह्या वेळार लेगीत दुबावितान ताका मारपेट करपाचो यत्न केलो. अखेर कांय गाडयेंतल्यान वचपी लोक ताचे मजतीक आयले आनी दुबाविताचे तावडेंतल्यान ताका सोडयलो. भाडें चड सांगिल्ल्यान आपूण ताका मारपेट करता, अशें दुबावीत बडबडटालो.
घडणुकेची म्हायती मेळटाच कोलवाळ पुलिसांनी घडणुकेचे सुवातेर धांव मारली आनी दुबाविताक तशेंत जखमीक ताब्यांत घेवन पुलीस स्टेशनार हाडलो. उपरांत जखमीक म्हापशें जिल्हो हॉस्पिटलांत उपचारा खातीर दाखल केलो. थंय ताचेर उपचार करून ताका घरा धाडलो.
पुलिसांनी दुबाविता आड भा.दं.सं.च्या 326 आनी 506 (2) कलमा खाला गुन्यांव दाखल करून दुबाविताक अटक केली. फुडलो तपास पुलीस उपनिरिक्षक सुभाष गांवकार करता. दुबावीत आरोपी पुलिसांक चवकशेंत आदार करिना.
दुबावीत जाला पादिसेर
दुबावीत आरोपीक सध्या रावपाक घर ना. चल्यान काडिल्लें रीण फारीक करचे खातीर ताणें कान्सा थियेचें आपलें घर विकलां आनी तो म्हापशें शार आनी हेर खंयूय रावता. ताची घरकान्न भुरग्यां सयत आवयगेर रावता. दुबावीत लेनी सिमॉयश हो दुचाकी मॅकानीक आनी तो खूबशीं वर्सां विदेशांत नोकरेक आशिल्लो, अशी म्हायती सुत्रांनी दिल्या.
लुटपाचो हेत आशिल्ल्याचो पुलिशेक दुबाव
दुबावीत आरोपी लेनी हो सकाळीं म्हापशें टॅक्सी स्टॅण्डार आयलो. ताणें पयलीं लक्ष्मण नायक हाची टॅक्सी महिंद्रा क्लबा कडेन वचपाक 800 रुपया भाड्याक थारायली. पूण आनीक आपले दोग सांगाती येवपाचें आसा अशें सांगलें आनी च्या पियेवपा खातीर गेलो. त्या वेळार नायक हाका दुसरें भाडें मेळ्ळें आनी ताणें आपूण इतलो वेळ वाट पळोवपाक शकना अशें सांगलें. ते उपरांत लायनींत आशिल्ली दुसरी गाडी ताका ताणें दाखयली, पूण ताका ताणें न्हयकार दिलो. अखेर सुभाष सावंत हांचे गाडयेंत बसून तो गेलो. लक्ष्मण नायक आनी सुभाष सावंत हांच्या गळ्यांत भांगराची सरपळी आशिल्ली, जाल्यार ज्या चालकाच्या गळ्यांत सरपळी नाशिल्ली ताचे गाडयेंत वचपाक ताणें न्हयकार दिलो. ताका लागून दुबाविताचो ह्या हल्ल्या फाटल्यान लुटपाचो हेतू आशिल्ल्याचो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
