भांगरभूंय | प्रतिनिधी
मालवण ते मंगळूर मेरेनचो सैमीक वाठार हो तांबडे मातयेचो. भुसभुशीत मोव माती. पालसणांची जमीन चडशी नाच. ताका लागून पावसाच्या दिसांनी उदकान फुगून माती, पालसणां पडपाचे प्रकार घडटातूच. कोंकण रेल्वेन दोंगर फोडून, बोगदे खणून रुळ घाल्यात. मात तांणी अशे पद्दतीन दोंगर कापला, खणला की सहसा तांच्या मार्गाचेर पालसणां कोसळनात. चुकूनच केन्ना तरी हें घडटा. मात हेर वाठारांत तीं पडपाचे प्रकार नवे न्हय. हालींच राष्ट्रीय म्हामार्ग 66 चेर मालप्यां रस्त्याचे कडेची राखणे वणत कोसळ्ळी. ही घडणूक ताजी आसतनाच म्हाखाजन- धारगळे राखणे वण्टीक धोको निर्माण जाल्ल्याचें दिसलें. मोपा विमानतळ बांदपाचें जाहीर जालें, तेन्ना सावन बरींच वर्सां हें रस्तो रुंद करपाचें काम चलतालें. सर्व्हीस रोड सारके नात, कामाचो दर्जो बाबत, लायटी, मार्ग दाखोवपी तकटे नात… अश्यो कागाळी प्रवासी, गाडयेकार सदांच करतात. पूण, आतांची ही मालपेंची घडणूक गंभीर म्हणपा सारकी. जर वण्टीचो तो शिमिटाचो
व्हडलो कुडको मोटारीचेर पडिल्लो जाल्यार चवगांचो जीव वचपाचो. माती पडटा ती ड्रायव्हरान वेळारूच पळयली म्हूण साल्वार.
फाटल्या पावसांत धारगळ, म्हाखाजन वाठारांत पालसणा कोसळून अर्दो राष्ट्रीय म्हामार्ग येरादारी खातीर बंद जाल्लो. तेन्ना थळाव्या आमदारांनी कंत्राटदाराक बरी घटशी राखणे वणत बांदपाक सांगिल्ली. मात, आतां ती नव्यान बांदिल्ली वणत पडपाच्या मार्गार आसा. म्हणटकच काम दर्जेदार जालां, अशें म्हणपाक मेळचें ना. गोंयचें सैमीक वातावरण वेगळें. तेलंगणा, नवी दिल्ली अशा राज्यांनी जे तरेन रस्ते, बोगदे, राखणे वण्टी बी बांदतात, ती पद्दत हांगा उपकरना. कोंकणपट्टेंत पावस चड. वाठार उंच, सकयल, दर्या लागीं, खारें वारें…. सगलें चिंतून बांदकाम करचें पडटा. हांगाच्या तज्ञांकूच ते विशीं चड खबर आसता. कोंकण रेल्वेन मात हो सगलो बारीकसारीक विचार करून पद्दतशीरपणान बोगदे, राखणे वण्टी बांदल्यात. जाळीं बी लायल्यांत. काँक्रिटाच्यो सोंपणां कश्यो राखणे वण्टी बांदल्यात. मात, म्हामार्गा वयल्या राखणे वण्टीं बाबतींत हें जावंक ना. रस्त्याचे कुशीक आशिल्लो दोंगर उबो म्हणल्यार सरळ रेशेंत, कापला. उदक जिरोवपाक दोंगर जे तरेन कापतात, तसो तो कापून रस्त्या देगेर जाड राखणे वणत उबारपाक जाय आशिल्ली. तातूंत बांदिल्ले वण्टीचो दर्जो बाबत, असो ती प्रत्यक्ष पळोवप्यांचो आरोप. म्हणटकच पालसणां कोसळचीं नात, जाल्यार आनीक कितें जातलें? वण्टींक खंय कांय कडेन वेरो गेल्यात. सर्व्हीस रोड गायब जाल्ल्यात. आसा तांकां फोंडकुलां पडल्यांत. धोक्याचीं मोडणां आसात. मदीं रस्त्याचेर उदक सांठून उरता. काम सारकें जावंक ना देखून हें जाता हें कोण न्हयकारपाक शकचो ना. काय गोंयांत चड पावस पडटा म्हूण हें जाता, अशें म्हणपाचें आनी पावसाक गुन्यांवकार धरपाचो? निदान हाचेर कंत्राटदारान बेगोबेग उपाय घेवन फुडाराक दुर्घटना घडची ना हाची जतनाय घेवची.
पर्वरी ते पेडणे मेरेन मदीं माती, फातराची रास आनी ताचे दोनूय वटेन बुराकांच्यो व्हडल्यो चौकटी जिगसाॅ कोड्या प्रमाण जोडून उड्डाण पूल उबारल्यात. हें बांदकाम एकामेकांक घट धरून आसा. पूण, पावसाचें उदक भितर जिरलें वा तुंबलें जाल्यार कितेंय जावं येता. कंत्राटदारान आनी बांदकाम खात्याच्या अभियंत्यांनी हाचीय तपासणी करपाक जाय. निदान पावसाच्या दिसांनी तरी. कारण मुखेल म्हामार्ग जाल्ल्यान वयल्यान, सकयल्यान मोटारी वचत आसतात. हें काम एमव्हीआर कंपनीक मेळ्ळां. ताचे आड लोकांनी साबार कागाळी केल्यात. ते विशीं पंचायतींनी सरकाराकूय कळयलां. मात कोणेच कंत्राटदाराक कांय विचारूंक ना. म्हणटकच तो कितलो पेजाद आसतलो? कांय राजकी फुडाऱ्यांच्या दाव्या प्रमाण, ह्या पुराय रस्त्याचें काम सुरू जावन सोंप मेरेन उणेच 25 लोकांक मरण आयलां. लायट ना, रस्त्यार, रस्त्या कुशीक फोंड, चर अश्या जायत्या कारणांक लागून. तेन्ना कंत्राटदारान रस्तो, पूल, राखणे वण्टी उबारतना गोंयकार जाणकारांचो, खास करून गांवांतल्या जाण्ट्यांचो सल्लो घेवपाक जाय आशिल्लो. कांय जाण्ट्यांक हांगाच्या सैमांत नेमकें कशें आनी कितें वापरून बांदकाम करपाक जाय, हाचें जितलें गिन्यान आसा, तितलें पदवी घेतिल्ल्या अभियंत्याक पसून आसचें ना. ह्या पुराय रस्त्याची पळोवणी शक्य तितले बेगीन करची. पत्रादेवी ते पर्वरी मेरेनच्या रस्त्याची…. आनी कामाक लागचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
