भांगरभूंय | प्रतिनिधी
पणजी, बातमीदार ः मुख्यमंत्री डॉ. प्रमोद सावंत हांच्या फुडारपणा खाला भाजपा सरकार पोरणें गोंयांतलो बेकायदेशीर बंगलो बुलडोझर घालून उडयतलें, अशी लोकांची अपेक्षा आशिल्ली. पूण तें जावंक ना. ते वटेन रियल इस्टेट माफियान आसगांवां दोगांचें अपहरण करून निवासी घर उध्वस्त केलें. आतां तरी मुख्यमंत्री कारवाय करतले काय, असो प्रस्न विरोधी पक्ष फुडारी युरी आलेमाव हांणी विचारला.
भायल्या लोकांक आपल्यो जमनी, शेतां, भाटां विकपी कांय गोंयकारां खातीर ही धोक्याची शिटकावणी. ह्या घडणुकां वयल्यान धडो घेवंक ना जाल्यार गोंयां भायल्या रियल इस्टेट आनी भूंय-माफियांक गोंयचो दरेक इंच हडप करपांत येश मेळटलें आनी तो दीस पयस ना अशी शिटकावणी युरी आलेमाव हांणी दिली.
आसगांवांतलें निवासी घर मोडचें न्हय हे खातीर पुलिसांनी बेगोबेग कारवाय करचे परस कळाव करपाचें धोरण आपणायलें हें कळटकच म्हाका धक्कोच बसलो. उल्लेख केल्लें घर मोडपाक सोंपें जावचें म्हणून घरांतल्या दोन दादल्या वांगड्याचें अपहरण केलें, हें तर चडूच गंभीर आसा अशें आलेमाव हांणी सांगलें. हाका जापसालदार आशिल्ल्या सगळ्यांचेर खर कारवाय करपाची मागणी हांव करतां. मुख्यमंत्री डॉ. सावंत हांणी ह्या प्रकरणा कडेन संबंदीत आशिल्ल्या पुलीस अधिकाऱ्यां आड कारवाय करची अशी मागणी आलेमाव हांणी केल्या.
आमच्या ल्हान गोंयची राखण करपा खातीर सगल्यां गोंयकारांनी मजत करची असो उलो हांव गोंयकारांक करता. आमी आमचे मदीं झगडून भायल्या लोकांक आमच्यो जमनी हडप करपाक दिवंक फावना. फुडल्या पिळग्यां खातीर आमी जापसालदार आसात आनी गोंय वाचवप हें आमचें पयलें कर्तव्य अशें आलेमाव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
