भांगरभूंय | प्रतिनिधी
नवी दिल्ली, खबरां संस्था: भारतीय नौदलांत नोकरी मेळोवपाची आसल्यार ही खबर तुमचे खातीर. भारतीय नौदळान अग्निवीर एमआर (संगीतकार) पदा खातीर आशिल्ली रिती सुवात जाहीर केल्या. जाचे खातीर ऑनलायन अर्ज १ जुलय सावन सुरू जातलो. हे रिते सुवाते खातीर दादले आनी बायलो दोगांय अर्ज करपाक शकतात. पूण हाचे खातीर दोगांयनी आंकवार आसप सक्तीचें.
ह्या पदाचेर अर्ज करपाक सोदपी उमेदवार भारतीय नौदळाची वेबसायट joinindiannavy.gov.in वरवीं अर्ज करपाक शकतात. अर्ज करपाची निमाणी तारीख ११ जुलय थारायल्या. नौदळांत एमआर (संगीतकार) ह्या पदाचेर भरती जाले उपरांत विधीपुर्वक परेड आनी अधिकृत कार्यावळी वेळार नौदळ बँडांत वाद्य वाजोवचें पडटा. भारतीय नौदळाचो बँड नौदळाच्या संवसारभरच्या कार्यावळींनी सादरीकरण करता.
वेंचून काडिल्ल्या उमेदवारांक फावो तें प्रशिक्षण दितले. उमेदवार आयएनएस चिल्कांत १४ सप्तकांचें मुळावें प्रशिक्षण घेतात आनी उपरांत आयएनएस कुंजली हांगा वेवसायीक प्रशिक्षण घेतात. ह्या रिकाम्या जाग्या खातीरय पिरायेची मर्यादा थारायल्या, ते प्रमाण नौदळांतल्या एमआर (संगीतकार) पदाचेर उमेदवार १ नोव्हेंबर २००३ ते ३० एप्रील २००७ ह्या काळांत जल्मल्ले आसूंक जाय.
एमआराक म्हयन्याक ३० हजार रुपया तशेंच पगारांत वर्सुकी वाड जातली. शिक्षणीक पात्रताये विशीं उलयतना उमेदवाराक खंयच्याय मान्यताय मेळिल्ले शाळेंतल्यान १० वी पास जावंक जाय. वाद्य, वाद्यांचेर हिंदुस्तानी वा कर्नाटक शास्त्रीय संगीताचो अणभव घेवप गरजेचें. उमेदवार चड म्हायती खातीर अधिसुचोवणी तपासूंक शकतात.
शिक्षणीक पात्रताय सोडल्यार उमेदवारांची फिटनेस चांचणीय जातली. जाचे खातीर कांय निकश थारायल्यात. हातूंत धांवप, बसप, पुश-अप, वांकून बसप अश्यो चांचण्यो दिवच्यो पडटात. दादले- बायलांक हे निकश वेगवेगळे आसतात. म्हणल्यार दादल्या उमेदवारांक ६ मिनटां ३० सेकंदांत १.६ किमी धांवचें पडटा, जाल्यार बायलांक ८ मिनटांनी पुराय करचें पडटा. तेच प्रमाण दादल्यांक २० सिटअप, १५ पुशअप आनी १५ बेंट सिटअप करचे पडटात, जाल्यार बायलांक १५ सिटअप, १० पुशअप आनी १० बेंट सिटअप करचे पडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
