भांगरभूंय | प्रतिनिधी
नवी दिल्ली, खबरां संस्था ः बनावट वाहन नोंदणी, वाहन क्रमांक, चेसिस आनी इंजिन क्रमांक जारी करपी व्हडलें नेटवर्क देशांत सक्रीय आसा. आरटीओ एजंट ते सरकारी अधिकाऱ्यां मेरेन 2000 परस चड लोकांचो हातूंत आसपाव आसा. एक लाख ते 1.70 लाख रुपया मेरेन कागदपत्रां नासतना गाडयेची नोंदणी करून नवे क्रमांक जारी करतात. हातूंत आरटीओचो वाटो 70% आनी सिंडिकेटाचो वाटो 30% आसा. सिंडिकेट फकत क्रमांकच जारी करिनात, जाल्यार तांचो थेट संबंद गाडयो चोरपाच्या गटां कडेन, विक्री ब्रोकर आनी फायनान्स करप्यां कडेन आसा. सगळेच एकामेकांक जोडिल्ले आसात. हो गट पुरायपणान ऑनलायन वावुरता. आतां हो गट ट्रेलर- ट्रका उपरांत चोरी केल्ल्या लक्झरी गाडयां खातीर नवे नंबर विकतात.
चोरी केल्ल्या गाडयांचेर स्क्रॅपांतल्या गाडयांचे क्रमांक प्रिंट करुन विक्रि करपी गटान काश्मीरांत 2019 त जाल्ल्या हुंवारांत स्क्रॅपांत आयल्ल्यो गाडयो विकत्यो घेतल्यो. हाचे उपरांत तांचे सारकिल्ल्या मॉडेलाच्यो गाडयो चोरल्यो. उपरांत स्क्रॅपांतल्या गाडयांचे क्रमांक तांचेर प्रिंट करुन त्यो विकल्यो.
कंपनीक बनावट क्रमांक वळखुप कठीण
सिंडिकेट, आरटीओ आनी गट: देशांत खंयच्याय सुवातेर चोरी जाल्ली गाडी, आरटीओत कर भरनाशिल्ली गाडी आनी फायनान्स कंपनींनी उखलून घेतिल्ल्या गाडयां विशीं म्हायती ह्या नेटवर्का वरवीं पातळटा. हातूंत चोर, बँक फायनान्स एजंट हांचो आस्पाव आसता. नव्या क्रमांकान ह्यो गाडयो बाजारांत हाडूंक मेळटात. उपरांत हांगा सिंडिकेटचो आस्पाव जाता. सिंडिकॅटान जारी केल्लो चेसिस क्रमांक प्रिंट करपा खातीर गाडी नागालँडाक व्हरपाची गरज ना. कारण, सिंडिकेटाचे वांगडी दरेका जिल्ह्यांत आसतात. ते सुवातेर येवन पोरणो चेसिस क्रमांक काडून नवो क्रमांक प्रिंट करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
