भांगरभूंय | प्रतिनिधी
तीन घरांक झाडाचो धोको: थळाव्यांनी तिडक उक्तावन पंचयती कडेन केली कागाळ
हरमल, बातमीदार: देऊळवाडो, हरमलच्या हरमलकार हांच्या घराचेर धोको निर्माण करपी पिपळाचें झाड लवंडलां. हाका लागून तन घरांक धोको निर्माण जाला. हे विशीं उजो पालोवपी दळाक म्हायती दिली. मात झाड कापपाची मागणी भायर मारून अधिकारी थंयच्यान गेले. तांचे हे कृतीचो नागरिकांनी निशेध केला.
मजगतीं, काल सकाळीं सुमार १० वरांचेर बरेंच व्हड पिपळाचें झाड लवंडून हेर झाडांच्या खांदयांनी शिरकल्ल्यान व्हड लुकसाण जावपा पसून वाटावलें. ह्या झाडाच्यो खांदयो घराक लागिल्ल्यान थळावे नागरीक हरिश्चंद्र हरमलकार हांच्या कुटुंबान उजो पालोवपी दळा कडेन संपर्क केलो. दळाच्या अधिकार्यांनी येवन थंय पळोवणी केली आनी झाडाच्या वयलो भार उणो करात. आमी सकयलो भाग काडटां अशें सांगून थंयच्यान ते गेले, अशें हरमलकार हांणी सांगलें.
ह्या वेळार थळाव्यांनी झाड पुरायेन घराचेर पडल्या उपरांत उजो पालोवपी दळ येवन तें काडटलें कांय असो प्रस्न अधिकार्यांक केलो.
खांदयांच्या वजनाक लागून झाड लवंडलां. तांतल्यो दोन खांदयो घराचेर आयल्यात. आनीक वारो आयल्यार पुराय झाड घराचेर पडटलें अशें दिसता. मात उजो पालोवपी दळ कोणाची वाट पळयता? असो प्रस्न हरमलकार हांणी करून, ह्या झाडाक लागून आनीक दोन घरांक धोको निर्माण जाला, अशें तांणी सांगलें.
हरिश्चंद्र हरमलकार हे पायलट वेवसाय करतात. झाडा कापून घेवप शक्य नाशिल्ल्यान तांणी आपली कागाळ पंचायती कडेन दिल्या. ह्या वाठाराची पंच वांगडी गुणाजी ठाकूर हांणी पळोवणी केली. तरी पंचायत तशेंच संबंदीत अधिकार्यांनी हे विशीं लक्ष घालून न्याय दिवचो अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
