भांगरभूंय | प्रतिनिधी
मक्का, खबरां संस्था: सावदी अरेबियांत अंदूं हज यात्रेक लागून १३०० वयर लोकांक मरण आयिल्ल्याची म्हायती मेळ्ळ्या. रेंवटांतल्या ह्या इस्लामी पवित्र थळाचेर तापमान वाडलां, अशें सावदी अधिकार्यांनी आयतारा जाहीर केल्लें. भलायकी मंत्री मंत्री फहद बिन अब्दुर रहमान अल-जलाजेल हांणी, मरण आयिल्ल्या १३०१ जाणां मदले ८३ टक्के अनधिकृत यात्रेकरु आशिल्ले, अशें सांगलें. जे पवित्र शार मक्का आनी लागींची हज विधी पुराय करपा खातीर वाडपी तापमानांत बरेंच लांब अंतर चलताले. सध्या ९५ यात्रेकरूंचेर हॉस्पिटलांत उपचार सुरू आसात. तातूंतल्या कांय जाणांक उपचारा खातीर राजधानी रियाधांत विमानांतल्यान व्हेल्यात. मरण आयिल्ल्या जायत्या यात्रेकरूं कडेन वळखपत्रां नाशिल्ल्यान वळख प्रक्रियेक कळाव जाता अशें तांणी सांगलें. मरण आयिल्ल्यांक मक्का हांगा दफन केले, अशें तांणी सांगलें. मरप्यांमदीं १०० भारतीय आसात.
१६ ट्रॅव्हल कंपन्यांचे परवाने रद्द
मरण आयिल्ल्या लोकां मदीं ६६० परस चड इजिप्तांतले लोक आशिल्ले. तातूंतले ३१ सोडल्यार हेर सगळे अनधिकृत यात्रेकरू आशिल्ले. अनाधिकृत यात्रेकरूक सावदी अरेबियाक वचपाक मजत केल्ल्या १६ ट्रॅव्हल एजन्सींचे परवाने इजिप्तान रद्द केल्यात अशें अधिकार्यांनी सांगलें.
इतिहासीक नदरेन हजाच्या काळांत सेगीत मरण आयलां. पांच दिसांचे यात्रेक २० लाखां परस चड लोक सावदी अरेबियाक वतात. हे यात्रे वेळार खूब चिड्डाचिड्डी जाता. दुयेंसांय पातळटात. २०१५ वर्सा मीना हांगा चिड्डून २४०० वयर यात्रेकरुंक मरण आयिल्लें. ही चिंगराचिंगरी आतां मेरेनची सगळ्यांत घातकी आशिल्ली. तर त्याच वर्साचे सुरवेक मक्काचे ग्रॅण्ड मशिदींत क्रेन कोसळून १११ जाणांक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
