भांगरभूंय | प्रतिनिधी
दर्जेदार भलायकी सेवा दिवपाक सरकार सक्रीयः शेट
भांगरभूंय । प्रतिनिधी
दिवचलः गांवगिऱ्या वाठारांतल्या लोकांक दर्जेदार अत्याधुनीक भलायकी सेवा दिवपाक राज्य आनी केंद्र सरकार सक्रीय आसा. मयें भलायकी केंद्रांत एटीएम मशिनाच्या माध्यमांतल्लयान एकाच वेळार सुमार 46 परस अदीक तरेच्या दुयेंसांचें निदान करपी मशीन बसयलां. ताका लागून खऱ्या अर्थान भलायकी मळार खूब फायदो जातलो, अशें मयेंचे आमदार प्रेमेंद्र शेट हांणी सांगलें.
मयां मुळाव्या भलायकी केंद्रांत ईसीजीसीन सीएसआर खाला हें हॅल्थ एटीएम मशीन बसयलां. मानव विकास संस्थे वतीन तें चालीक लायलां.
गांवगिऱ्या वाठारांतल्या लोकांक भलायकेची जतनाय घेवचे खातीर ह्या मशिनाचो खूब फायदो जातलो. ह्या मशिनाक लागून तपासून जाले उपरांत ताचो अहवाल दुयेंतींक व्हॉट्सअॅपाचेर तत्काळ धाडपाची वेवस्था आसतली. कसलें दुयेंस जालां ताचें निदान लेगीत ताकतिकेन जातलें. ह्या मशिना वरवीं खूबश्या दुयेंसांच्यो चांचण्यो जातल्यो. गांवगिऱ्या वाठारांतले लोक जे भलायके कडेन सदांच आडनदर करतात, तांकां ह्या मशिनाचो निश्चीत फायदो जातलो, अशें प्रेमेंद्र शेट हांणी सांगलें.
नोडल ऑफिसर डॉ. केदार, भलायकी अधिकारी डॉ. सिद्धी कासार, मानव विकास संस्थेचे कार्तिकेय तिवारी, मदन बैखा, अमीत चौधरी तशेंच दोतोर आनी कर्मचारी हाजीर आशिल्ले.
ह्या आधुनीक तंत्राचो लोकांक खूब फायदो जातलो. मशिनांत ऑक्सिडजनाची मात्रा ब्लड प्रेशर मेटाबोलीक एज, वजन, युरीन टेस्ट, गुरवारपण, डेंग्यू, मलेरिया, टायफायड, एचआयव्ही, ग्लुकोज हिमोग्लोबीन हे विशींचें निदान आनी चांचणी सहजकायेन उपलब्ध करपाक मेळटली, अशें डॉ. केदार हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
