भांगरभूंय | प्रतिनिधी
फोंडें, प्रतिनिधी: गोवा डेअरी आनी बंद आशिल्ल्या गोरवां खाण प्रकल्पाची सुमार १ लाख चौरस मिटर सुवातेची एकूच लिज रद्द केल्ले खातीर दूद उत्पादकांनी आयतारा जाल्ले विशेश बसकेंत आक्षेप घेतला. गोवा डेअरीक फाटल्या वर्सा सुमार ७०- ८० लाख रुपयांचो फायदो जाल्लो. जाल्यार बंद आशिल्ल्या गोरवां खाण प्रकल्प साडे इकारा कोटी रुपया लुकसाणांत आसा.
केंद्र सरकाराच्या आदेशा प्रमाण पशु संवर्धन खात्यान १९८४ वर्सा कुट्टेच्या गोवा डेअरी आनी उसगांवच्या गोरवां खाण प्रकल्पा लागसारा सुमार एक लाख चौरस मिटर जमीन दर म्हयन्याक १ रुपया दरान लिजाचेर दिल्ली. मात २०२२ वर्सा सरकारान गोवा डेअरीचे तेन्नाचे नियुक्त केल्ले प्रशासक डॉ. आगोस्तिन मिस्कीता हांणी तेन्ना गोवा डेअरी लुकसाणांत गेल्ल्यान, सरकारन हाचेर निर्णय घेवपाचो अहवाल पशु संवर्धन खात्याक दिल्लो. ते प्रमाण दोन वर्सां उपरांत पशु संवर्धन खात्यान लिज रद्द करपाक गोवा डेअरीक कारणां दाखयात नोटीस धाडिल्ली. ताचे निर्णय घेवपा खातीर सरकारन नियुक्त केल्ल्या प्रशासकीय समितीचे अध्यक्ष पराग नगर्सेकार, रामा परब आनी संदीप पार्सेकार हांचे अध्यक्षते खाला आयतारा विशेश बसका आयोजीत केल्ली. विशेश बसकेंत राज्यांतल्या वट्ट ६५ विवीध संस्थाचे अध्यक्ष हाजीर आशिल्ले.
विशेश बसका सोंपल्या उपरांत चड म्हायती दितना अध्यक्ष पराग नगर्सेकार हांणी पशु संवर्धन खात्यान कुर्टी आनी उसगांवचे सुवातेचें एकूच लिज तेन्ना केल्लें. उसगांवचो गोरवां खाण प्रकल्प लुकसाणांत आसा. जाल्यार गोवा डेअरी फायद्यांत आशिल्ल्यान लिज रद्द करपाक दूद उत्पादकांनी विरोध उक्तायला. फाटल्या वर्सा गोवा डेअरीक सुमार ७० ते ८० कोटी रुपयांचो फायदो जाल्लो. आयतारा जाल्ले विशेश बसकेचो थाराव पशु संवर्धन खात्याक धाडटलें अशें तांणी सांगलें.
गोवा डेअरीचे आदले अध्यक्ष तशें दूद उत्पादक दुर्गेश शिरोडकार हांणी, लिजेंत गोवा डेअरी आनी गोरवां खाण प्रकल्प वेगवेगळे सुवातेर आसा. मात लिज केल्या उपरांत गोवा डेअरी बंद जावपाचो भंय दूद उत्पादकांक आसा. कारण दोनूय लिज एकूच आशिल्ल्यान नोटीस पुरायेन चुकीची आसा. गोरवां खाण प्रकल्पांत व्हडलो अर्थीक घोटाळो जाला. ताका लागून गोरवां खाण प्रकल्पाचें खाजगीकरण करपाक विरोध ना. मात गोवा डेअरी फायद्यांत आसतना लिज रद्द करपाक दूद उत्पादकांचो विरोध आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
