भांगरभूंय | प्रतिनिधी
बंगळुरू, खबरां संस्था: सेक्स स्कँडल प्रकरणांत जनता दल (धर्मनिरपेक्ष) पक्षाचे आदले खासदार आनी आदले प्रधानमंत्री एच डी देवेगौडा हांचो नातू प्रज्ज्वल रेवण्णा हाका हालींच अटक केल्या. आतां प्रज्ज्वलाचो खाश्या भाव सुरज हाकाय लैंगीक अत्याचार प्रकरणांत अटक जाल्या. जेडीएस पक्षाच्या कार्यकर्त्यान दाखल केल्ले कागाळी उपरांत पुलिसांनी विधानपरिशदेचो आमदार आशिल्लो सुरज रेवण्णा हाका अटक केली.
पुलीस स्टेशनांत दाखल केल्ले कागाळी प्रमाण, १६ जुनाक सुरज रेवण्णान ह्या दादलो कार्यकर्त्याक फार्म हावजाचेर आपयल्लो. थंय ह्या तरणाट्याचेर लैंगीक छळ केलो. तशेंच ताका मारबडय केली. पिडेस्त तरणाट्यान कागाळ दाखल केले उपरांत पुलिसांनी असैमीक लैंगीक कृत्याचो गुन्यांव दाखल केला.
पिडेस्त तरणाट्यान कागाळींत म्हणलां, सुरजान लैंगीक अत्याचार केल्या उपरांत आपल्याक राजकारणांत बरें पद दिवपाचें हांयस दाखयलें. हे घडणुके उपरांत तांणी सुरजाक मॅसेज करून हे विशीं विचारलें. तेन्ना सगळें सारकें जातलें ह्या शब्दांनी सुरजान आस्वासन दिलें अशें तरणाट्यान कागाळेंत म्हणलें.
मजगतीं शेनवारा सुरज रेवण्णा आनी ताचो वांगडी शिवकुमार हांणी पिडेस्त तरणाट्या आड धमकेचो आनी खंडणी मागपाचो गुन्यांव दाखल केल्लो. लैंगीक अत्याचाराचो फटींग गुन्यांव दाखल करून तुमची बदनामी करतलों अशीं धमकी पिडेस्त तरणाट्यान दिली, अशें रेवण्णा हांणी दाखल केल्ले कागाळींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
