भांगरभूंय | प्रतिनिधी
नवी दिल्ली, खबरां संस्था: ‘यूजी-नीट २०२४’ परिक्षेंतल्या आरोपींत अनियमिततायेची चवकशी करपा खातीर सीबीआय आनी ईडीक निर्देश दिवचे अशी मागणी करपी नवी याचिका सर्वोच्च न्यायालयांत दाखल केल्या. ही याचिका परिक्षेंत हाजीर आशिल्ल्या १० विद्यार्थ्यांनी दाखल केल्या. तशेंच ह्या प्रकरणाची बेगोबेग चवकशी करपाक बिहार पुलिसांक निर्देश दिवचे अशीय मागणी विद्यार्थ्यांनी केल्या.
हालींच ह्या विशयाचेर आनीक एक याचिका सुनावणी करतना सर्वोच्च न्यायालयान केंद्र सरकार, राष्ट्रीय चांचणी एजन्सी आनी हेरांक नोटीस जारी केली. देशभरांत ५ मे दिसा जाल्ली परिक्षा रद्द करून न्यायालयाच्या देखरेखी खाला चवकशी करची अशी मागणी याचिकेंत केल्ली.
नीटांत जावपी अनियमिततायेक लागून देशभरांतल्या वेगवेगळ्या सुवातींनी कारवाय सुरू आसा. झारखंडांतल्या देवघरांतल्यान स जाणांक ताब्यांत घेतिल्ल्याची म्हायती बिहार पुलिसांनी शेनवारा दिली. तशेंच, जप्त केल्ल्या कागदपत्रांची खात्री करपा खातीर बिहार पुलिसांच्या अर्थीक गुन्यांव फांट्यान शेनवारा ‘नीट’ची प्रस्नपत्रिका मेळयली. ह्या प्रकरणांत नार्को विश्लेशण आनी ब्रेन मॅपिंग चाचणीय करूं येता अशें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
