भांगरभूंय | प्रतिनिधी
युरो करंड फुटबॉल सर्तींत फ्रान्स आनी नॅदरलॅण्ड ह्या पंगडां मदीं जाल्ली मॅच गोलाविणें बादाबाद उरली. फ्रान्साचो मुखेली किलीयन एम्बाप्पेक फाटले मॅचींत दुखापत जाल्ली. ताका लागून तो हे मॅचींत खेळूंक ना. ताचें नांव राखीव खेळगड्यां मदीं दवरिल्लें. पूण, तो खेळपाक मैदानांत देंवूंक ना. नॅदरलॅण्डान हाचो फायदो घेत फ्रान्साक गोलाविणें बादाबाद आडायलो.
फ्रान्सान फाटले मॅचींत ऑस्ट्रिया पंगडाक 1-0 असो हारयिल्लो. ते मॅचींत एम्बाप्पेच्या नाकाक दुखापत जाल्ली.
मॅची पयलीं एम्बाप्पेन मास्क घालून सराव केल्लो. नॅदरलॅण्डा आड तो खेळटलो अशी आस्त मुखेल प्रशिक्षक डिडीएर डेसचॅम्प्साक आशिल्ली. पूण, फ्रान्सान नॅदरलॅण्डाच्या पंगडांतल्या धिप्पाड आशिल्ल्या डिफॅण्डरा आड एम्बाप्पेक मैदानांत देंवपाची जोखीम घेवंक ना.
मॅच जरी गोलाविणें बादाबाद उरली आसली तरी फ्रान्सा पुर्ण मॅचीचेर आपलो शेक दवरलो. ताणें नॅदरलॅण्डाच्या गोलपोस्टाचेर 15 शॉट मारले. पूण, तातले फकत तिनूच शॉर्ट्स ऑन टार्गेट आशिल्ले. दुसरे वटेन नॅदरलॅण्डान 8 शॉर्ट्स मारले.
मॅचीचेर ताबो मेळोवपाक लेगीत फ्रान्स मुखार आशिल्लो. ताणें वट्ट वेळाच्या 63 टक्के वेळ बॉलाचेर ताबो मेळयलो. पूण, ताका संदीचें रुपांतर गोलांत करपाक जमलें ना. ताका लागून फ्रान्साक गोलाविणें बादाबादाचेर समाधान मानचें पडलें.
हे मॅची उपरांत फ्रान्स आनी नॅदरलॅण्डाचे दरेकी चार गूण जाल्यात, ऑस्ट्रियाचे 3 गूण आसात.पोलंडाचो दोन मॅचींतल्यान एकूय गूण ना. सर्तीतंलें ताचें आव्हान लागींलागीं सोंपलां. फ्रान्सा आडची मॅच जिखली तरी ताका फुडले फेरयेंत सुवात मेळोवपाक जमची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
