भारत सेमी फायनलीच्या हुमऱ्यार

भांगरभूंय | प्रतिनिधी

भारतान सुपर आठांतले आपले दुसरे मॅचींत बांगलादेशाक 50 धांवड्यांनी हारोवन संवसारीक टी-20 सर्तीचे सेमी फायनलींत सुवात मेळोवपा वटेन आनीक एक पावल मारलें.

भारतान पयलीं बॅटींग करतना निर्धारीत 20 ओव्हरींनी 5 विकेटी व्हगडावन 196 धांवड्यो केल्यो आनी उपरांत बांगलादेशाक 8 बाद 146 धांवड्यांचेर आडायलो.
 भारत गट एकांत पयले सुवातेर पावलो. ताचे दोन मॅचींतल्यान चार गूण जाल्यात. मोखीचो फाटलाव करपी बांगलादेशाचो डाव चायनामॅन कुलदीप यादवान गडगडावन उडयलो. ताणें चार ओव्हरींनी 19 धांवड्यो दिवन 3 विकेटी घेतल्यो. ताचे खेरीत फास्ट बॉलर अर्शदीप सिंगान आनी जसप्रीत बुमरान दरेकी 2 विकेटी मेळयल्यो.

ते पयलीं रोहीत शर्मा (23), विराट कोहली (37) आनी ऋषभ पंत (36) हांच्या बरे सुरवाती उपरांत हार्दीक पांड्या (नाबाद 50) हाचो आकर्शक अर्द शेंकडो आनी शिवम दुबे (34) हाच्या वांगडा केल्ले जलद 53 धांवड्यांचे भागिदारी नेटार भारतान बरो स्कोर उबारलो.

हांगाच्या सर व्हिव्हीयन रिचर्ड्स स्टेडियमा वयले स्लो खेळपट्टीचेर अंदूंचे संवसारीक सर्तींत खंयच्याय पंगडान उबारिल्लो हो सर्वोच्च स्कोर थारलो.

मजगतीं, बांगलादेशान टॉस जिखून भारताक पयलीं करपाचें आमंत्रण दिलें. मुखेली नाजमूल होसैन शांन्तोन स्पिनरां वरवीं आक्रमणाची सुरवात केली. ख र वत पडिल्ल्यान खेळपट्टी आनीक स्लो जावपाची शक्यताय आशिल्ल्यान घडये शांन्तो हो निर्णय घेतला आसुये. पूण, तांची ही रणनिती रोहीत शर्मा आनी विराट कोहलीन फोल थारायली. दोगांयनी आक्रमक सुरवात केली. दोगांयनी पावर प्लेचो योग्य फायदो करून घेतलो. पूण, अखेरेक शाकिर अल हसनान घाल्ले चवथे ओव्हरींत रोहीत कॅच बाद जालो. शाकिबाच्या स्लो बॉलाचेर ऑन सायडींत हीट करपाच्या यत्नांत फुलर बॉल बॅटाचे भायले धारेक लागलो आनी मिड ऑफांत जाकेरान धांवत कॅच धरली.

ऋषभ पंतान कोहली वांगडा मेळून धांवड्यांची गती कायम राखली. दोगांयनी आठवे ओव्हरी मेरेन स्कोर 70 मेरेन व्हेलो. पूण, हे मजगतीं, णववे ओव्हरींत तंझीम हसन साकिबाच्या बॉलाचेर कोहली व्हड शॉर्ट मारपा खातीर स्टेप आवट जालो. पूण, तो चुकलो आनी बोल्ड जालो. कोहलीन 28 बॉलांनी 1 चवके आनी तीन सक्यांचे मजतीन 37 धांवड्यो केल्यो. सुर्यकुमार यादवान पयलोच बॉल बॅकवर्ड स्क्वॅर लेगांत सको मारलो. पूण, फुडल्याच बॉलाचेर विकेटकीपराक कॅच दिवन तो तंबूंत परतलो.

साकिबान तीन बॉलांनी दोन धपके दिले. ऋषभ पंतान सातत्यपूर्ण कामगिरी चालूच दवरतना कांय आकर्शक सके मारले. रिहाद होसेनाचे ओव्हरींत बरी बॅटींग चालू आसतना ऋषभ रिव्हर्स स्वीप मारपाक गेलो आनी कॅच बाद जालो. ताणें 24 बॉलांनी 36 धांवड्यो केल्यो. हातूंत चार चवक्यांचो आनी दोन सक्यांचो आस्पाव आशिल्लो. पंताचो हो शॉर्ट पळोवन डग आवटांत बशिल्लो कोहली सामको बेजारिल्लो दिसलो.

हार्दीक पांड्या आनी शिवम दुबे हांणी 34 बॉलांनी 53 धांवड्यांची भागिदारी केली. अखेरेक ही भागिदारी रिशाद होसैनान फोडली. ताणें शिवमाक बाद केलो. शिवमान 24 बॉलांनी तीन सक्यांचे मजतीन 34 धांवड्यो केल्यो. हार्दीकान 27 बॉलांनी नाबाद 50 धांवड्यो केल्यो. ताणें चार चवके आनी तीन सके मारले आनी भारताक व्हड स्कोर उबारून दिवपाक मजत केली.