भांगरभूंय | प्रतिनिधी
-युकेंत गोंयच्या मानकुरादाक वाडटी मागणी
भांगरभूंय समीप नार्वेकार
पणजीः गोंयचो मानकुराद आंबो संवसारीक पांवड्यार पावपाक लागला. हालींच गोंयच्यान मानकुराद अांब्याची निर्यात युकेंत जाल्या. थंय मानकुराद आंब्याक बरीच पसंती आसा. निर्यात केल्ले सगले आंबे विक्री जाल्ल्यात, तशेंच ह्या आंब्यांची मागणी वाडपाक लागल्या.
शेतकी संचालक संदीप फळदेसाय हांणी दिल्ले म्हायती प्रमाण, आंबे निर्यात करपा खातीर शेतकी खात्यान ट्रायल सुरू केल्ली. जे निर्यात करपी वेवसायीक आसात ते खात्या कडेन आयले आनी 300 कील मानकुराद आंब्यांचो पयलो बॅच तांणी युकेंत धाडलो. युकेंत पावले उपरांत मानकुराद आंब्यांची रोखडीच विक्री जावन धाडिल्लें आंबें सोंपले. ताका लागून मानकुराद आंब्यांक युकेंत लोक पसंती दितात, हे आमकां दिसून आयलें. ताका लागून फुडारांत मोट्या प्रमाणांत मानकुराद आंब्यांची निर्यात जातली, अशें फळदेसाय हांणी सांगलें.
अंदूं पयलेच खेपे मानकुराद आंब्यांची निर्यात केल्या. पोरूं अामी निर्यात करपाचे आमी यत्न केल्ले पूण निर्यात करपी वेवसायीक नवीन आशिल्ले कारणान ते शक्य जावंक ना. हे फावट भारतांतल्यान भाजी-फळां निर्यात करपी एपीईएडीए ह्या केंद्र सरकाराच्या संस्थेचो खात्यान आस्पाव करून घेतला.
शेतकारांक आमी प्रशिक्षण दिलां, मार्केटींग बोर्डाच्या अधिकाऱ्यां वांगडा बसका घेतली आनी वाळपयच्यान 300 कील मानकुराद आंबें आमी निर्यात करपाचे थारायाले, अशें शेतकी संचालक फळदेसाय हांणी सांगलें.
पयलो कन्सायनमेंट 300 कील मानकुरादाचो आमी तयार केलो. मे म्हयन्याच्या 30 वेर युके वचपी विमानान एपीईएडीएन हे आंबे धाडले. 18 वरांचो प्रवास करून हे आंबे लंडन शारांत पावले आनी थंयच्यान ते लंडनच्या वेगवेगळ्या सुपरमार्केटांनी पावले. निर्यात करपी संस्थेन दिल्ले प्रतिक्रिये प्रमाण
मानकुराद अांब्यांक विदेशांत बरीच मागणी आसा, अशी म्हायती शेतकी संचालकानी दिली.
लंडनकार मानकुराद कसो प्रतिसाद दिता हे पळोवपांक आमी कमी प्रमाणात आंबे धाडिल्ले. मानकुराद आंबे राखडेच विक्री जाले, आनी लोक परत मानकुराद अांब्याची मागणी करपाक लागले. पूण आंब्यांचो हंगाम सोंपिल्ल्यान तशेंच हे खेपे उत्पन्न उणे जाल्ल्यान आंबे परतून निर्यात करप शक्य जांवक ना. पूण फुडल्या वर्सा हो आंकडो वाडयतले तशेंच हांची निर्यात दुबय, शारजाह आनी हेर मध्य पूर्व देशांत धाडतले, अशें संचालकानी सांगलें.
मानकुराद अांब्याक किंमत बरी आसा जर भायल्या देशांनी मोल वाडीव मेळ्ळ्यार शेतकारूय आंब्याचे उत्पन्न वाडोवपाक यत्न करतले. हाचे पयली कसलेच आंबे आमी निर्यात करूंक ना. भारताच्या हेर राज्यांतल्या रत्नागिरी हापूस, केसर आनी तोतापुरी हे आंबे भायल्या देशांनी वयतात, अशें संचालकांनी सांगलें.
आतां गोंयची गावठी भाजी पावतली फॉरेनाक
चिटकी, भेंडें, तवशी, मिरसांग आनी ऑर्चीड फुलां आमी मध्यपूर्व देशांत आमी निर्यात करपाचे थारायला. गोंयात जे जे दर अासात, ताचे परस 25 टक्के चड दरान आमकां हे देशात मेळटली अशी आमकां आस्त आसा. पूण आमची गांवठी भाजी विकतले जाल्यार गोंयाक व्हियेतनाम आनी होलंड सारकिल्ले देशां कडेन सर्त करची पडटली. मध्यपूर्ण देशांत गोंयचे भाजयेचे पॅम्पलेट आनी जायराती करप चालू जाला. शेतकार आनी निर्यात वेवसायिकां वांगडा आमची बसका जाल्या. ऑक्टोबर मेरेन भाजयो निर्यात करपाक गोंय सज्ज आसा, अशें शेतकी संचालकानी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
