भांगरभूंय | प्रतिनिधी
-म्हायती दिवपाचे येरादारी पुलिसांक खंडपिठाचे निर्देश
पणजी: राज्यांतल्या रस्त्यांचे कुशीक वा हेर सुवातेर उबारिल्ल्या होर्डिंगा विशीं कितें कारवाय करतले, हाची म्हायती दिवची, आदेश गोंय खंडपिठान दिला. तशेंच उंच इमारतींचेर उबारिल्ल्या होर्डिंगा विशीं संबंदींत कंपनीक नोटीस जारी केल्या. हे विशींचो निर्देश न्या. एम. एस. कर्णीक आनी न्या. वाल्मिकी मिनेझीस ह्या दोन वांगड्यांच्या खंडपिठान दिला.
रस्त्यांचे कुशीक तशेंच न्हंयांच्या देगेर व्हड होडींग उबारतात. ठोस यंत्रणा नाशिल्ल्यान न्यायालयान खंयूय हार्डींग उबारतात. ताचेर नियंत्रण दवरपाक न्यायालयान 2007 त स्वेच्छा दखल घेतिल्ली. संबंदितांक वेळावेळार बेकायदो होर्डिंग्जांचेर कारवायेचे निर्देश दिल्ले. न्यायालयाक मजत करपाक ज्येश्ठ वकील एस. डी. लोटलीकार हांची अॅमिकस क्युरी म्हूण नेमणूक जाल्या. तांकां अॅड. साईली केणी मजत करतात.
ह्या प्रकरणाची शुक्रारा न्यायालयांत सुनावणी जाली, रस्त्याचे कुशीक पार्कींग वाठारांत फुटपाथाचेर तशेंच हेर सुवातेर मोबायल होर्डींग्ज उबारिल्ल्याची म्हायती अॅमिकस क्युरी अॅड. एस. डी. लोटलीकार हांणी दिली. तशेंच बिल्डर उंच इमारतीचेर व्हड होर्डींग्ज उबारतात हाची म्हायतीय न्यायालयांत दिली. हाची दखल घेवन न्यायालयान येरादारी पुलिसांक रस्त्याचे कुशीक वा हेर सुवातेर उबारिल्ल्या हार्डिंग्जा विशीं कितें कारवाय करतले हाची म्हायती सादर करपाक सांगलें. तशेंच उंच इमारतीचेर उबारिल्ल्या हार्डिंग्जा विशीं न्यायालयान बिल्डराक नोटीस जारी केल्या.
मजगतीं, रस्त्याच्या दुभाजकाच्या तशेंच कुशीक वीज खांब्यार उबारिल्ले होर्डींग संदर्भांत कंत्राटदाराक नोटीस धाडून तांणी खंयच्या यंत्रणे कडल्यान परवानगी घेतल्या ताची म्हायती सादर करपाक सांगलें. म्हानगरपालिका वाठारांतल्या उंच इमारतींचेर आशिल्ल्या 16 तले पांच होर्डींग काडल्यात. जाल्यार 11 होर्डींग्ज काडपा खातीर आठ सप्तकांची मुजत मागल्या. ते प्रमाण, न्यायालयान मुजत वाडोवन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
