भांगरभूंय | प्रतिनिधी
नवी दिल्ली, खबरां संस्था ः स्विस बँकांनी भारतीय लोकांचे काळे पयशे व्हड प्रमाणांत आसात अशें म्हण्टात. स्विस बँक कोणाचे कितले पयशे आसा तांची नांवा दिना ते खातीर ह्या बँकेंत वेवसायीक आनी राजकारण्यांचे काळे पयशे जमा आसता. पूण आतां स्विस बँकेंत भारतीयांनी दवरिल्ल्या पयशांत व्हड उणाव जाला अशी म्हायती उजवाडाक आयल्या. फाटल्या चार वर्सांत हो आंकडो सगळ्यांत उण्या पांवड्यार पावला.
भारतीय लोक आनी कंपनींनी थळाव्या शाखा आनी हेर वित्तीय संस्थां वरवीं स्विस बँकेत जमा केल्ले पयशे 2023 वर्सा 70 टक्क्यांनी उणे जाले. हो आंकडो चार वर्सांतलो सकयल्या पांवड्यार 1.04 अब्ज स्विस फ्रँक (9,771 कोटी रुपया) मेरेन देंवलो. स्विस बँकांनी भारतीयांचो पयसो 2021 वर्सा 14 वर्सांचो सगळ्यांत चड पांवड्यार पावलो त्या वेळार 3.83 अब्ज स्विस फ्रँक रक्कम भारतीयांची आशिल्ली.
स्विस नॅशनल बँकेच्या अहवाला प्रमाण स्विस बँकांनी भारतीयांची ठेवी 2006 वर्सा वट्ट 6.5 अब्ज स्विस फ्रँक आशिल्ली. हाचे उपरांत 2011, 2013, 2017, 2020 आनी 2021 ह्या वर्सांनी ही रक्कम वाडली. पूण आतां सेगीत दुसऱ्या वर्सा स्विस बँकेंत आशिल्ली रक्कम उणी जाल्या. स्विस बँकांनी भारतीय गिरायकांचो निधी उणो जावपाक मुखेलपणान बॉण्ड आनी हेर वेगवेगळ्या अर्थीक साधनांत आशिल्लो निधी उणाव हें कारण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
