पेंडणें तालुक्यांत झाडां पडपाचे प्रकार सुरुच
भांगरभूंय | प्रतिनिधी
पेडणें, प्रतिनिधी ः राज्यांत फाटल्या दोन दिसांत पावसान बरेच धुमशेण कांडलां. पावसाक लागून जायत्या वाठारांनी झाडां पडप, रस्त्यार उदक भरप, कांय कडेन लायट नासप अशे प्रकार चालूच आसात. घरांचेर, रस्त्यांचेर व्हड झाडां पडून मालमत्तेचें बरेंच लुकसाण जालां. कांय जाणांच्या गाडयांचेर तशेंच घरांचेर झाडां पडपाचे प्रकार घडल्यात. तशेंच रस्त्याचेर झाडां पडून येरादारीची कोंयडी जाल्या.
मेळिल्ले म्हायती प्रमाण पेडणें तालुक्यांत पावसान बरोच नेट धरला. सरमले पेडणेंच्या बाबल गुरव हांच्या घरा मुखार आशिल्ल्या शेडाचेर सावरीचें झाड पडून लुकसाण जालें. कोटकरवाडो पेडणें हांगा शेखर पेडणेकार हांच्या घरा कुशीक रस्त्यार भेंडयेचें झाड पडलें, ओशलबाग धारगळें रस्त्यार माड पडलो, न्हंयबाग हांगा औदुंबर स्वर हांच्या घराचेर पिपळाचें झाड पडलें, कासरवर्णे हांगा मुखेल रस्त्यार झाड पडलें, पार्से रस्त्याचेर झाड पडले, तोर्से हांगाच्या सोमा परब हांच्या शेडीचेर आंब्याचें झाड पडलें.
मजगतीं, रातच्या वेळार उजो पालोवपी दळाच्या जवानांनी रस्त्यांचेर आनी घरांचेर पडिल्लीं झाडां कापून कुशीक केली. सहाय्यक अधिकारी प्रशांत धारगळकार, हवालदार प्रदीप असोलकार, ड्रायव्हर शैलेश हळदणकार, राजेंद्र खरात, जवान आमोल परब, धनंजय वस्त, यशवंत नायक, सर्वेश पार्सेकार, शेखर मयेकार, जयराम कानोलकार, राहुल पालयेकार हांणी ह्या वावरांत मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
