भांगरभूंय | प्रतिनिधी
नवी दिल्ली, खबरां संस्था ः नीट आनी यूजीसी-नेट परिक्षांचे पेपर लीक जाल्ल्यान देशभरांत बोवाळ आनी बरीच चर्चा निर्माण जाली. हाका लागून फुडाराक पेपर लीक जावपाच्यो अशो घडणूकी घडच्यो न्हय हे खातीर सरकारान व्हडलो निर्णय घेतला. 21 जून 2024 म्हळ्यार शुक्रारा सावन केंद्र सरकारान भौशीक परिक्षा कायद्याच्यो तरतुदी चालीक लायल्यात. ताचे खाला परिक्षेंत जावपी फटवणूक आनी गैरप्रकार आडावपा खातीर उण्यांत उणी 3 ते 5 वर्सां बंदखणीची तरतूद केल्या. जाल्यार पेपर लीक करप्यांक 5 ते 10 वर्सां बंदखण आनी उण्यांत उणें 1 कोटी रुपया दंड भरपाची तरतूद आसा. संसदेन फेब्रुवारी म्हयन्यांत भौशीक परिक्षा कायदो 2024 मंजूर केल्लो.
https://www.facebook.com/bhaangarbhui/videos/1008770920645778
परिक्षा घेवपी संस्था, सेवा पुरवणदार वा हेर खंयचेय संस्थेन खंयचोय संघटीत गुन्यांव केल्यार तांकां उण्यांत उणी 5 वर्सां बंदखणीची ख्यास्त दितले, जी 10 वर्सां मेरेन वाडूंय येता. तशेंच 1 कोटीचो दंडूय भरचो पडटलो. केंद्रीय लोकसेवा आयोग (UPSC), स्टाफ सिलेक्शन कमिशन (SSC), रेल्वे, बँकिंग भरती परिक्षा आनी नॅशनल टेस्टिंग एजन्सी (NTA) कडल्यान जावपी भौशिक परिक्षांनी गोरप्रकार जावचे न्हय हो ह्या कायद्याचो हेत आसा.
कायद्यांत मालमत्ता जप्त करपाचीय तरतूद
हो दंड एक कोटी रुपया परस उणो आसूंक फावना अशें कायद्यांत म्हळां. खंयच्याय संस्थेचो संघटित पेपर लिक प्रकरणांत वांटो आसल्यार संबंदीत संस्थेची मालमत्ता जप्त करपाचीय तरतूद कायद्यांत आसा आनी परिक्षेचो खर्चूय संबंदीत संस्थे कडल्यान वसूल करूं येता. परिक्षेचे पेपर लीक वा जापो लीक करप, अनधिकृत संवादांतल्यान परिक्षेच्या वेळार उमेदवारांक मजत करप, संगणक नेटवर्क वा हेर साधनां कडेन छेडछाड करप, प्रॉक्सी उमेदवारांची नेमणूक करप (डमी उमेदवार) हाचेर कायद्यान बंदी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
