भांगरभूंय | प्रतिनिधी
म्हापशें: धामाडें थिये गोरवांच्या गोट्याक लागिल्ल्या उज्यांत तण लासून गेल्ल्यान 90 हजारांचें लुकसाण जालें. गोट्यांतल्या गोरवांक प्रसंग पळोवन धनयान सोडिल्ल्यान 13 म्हशी उज्या पसून वाटावल्यो.
ही दुर्घटणा शुक्रारा सकाळीं 6.30 वरांच्या सुमाराक घडली. ह्या गोरवांच्या गोट्याक अचकीत उजो लागलो. उजो लागतकच धनी प्रेमानंद पंढरी मालवणकार हांणी प्रसंग पळोवन गोट्यांतल्या सगल्या गोरवांक सोडून दिलीं. हातूंत 13 म्हशी दोन रेडकां आशिल्लीं.
ह्या गोट्याचे एके वटेन माळो तयार करून गोरवां खातीर लागपी तण दवरिल्लें. ह्याच तणाक उजो लागलो. घडणुकेची म्हायती उजो पालोवपी दळाक मेळटकच दळाच्या जवानांनी घडणूक थळार धांव घेतली. तो मेरेन पुराय तणाक उज्यान रेवाडिल्लो.
उदकाचो फवारो मारून उजो दळाच्या जवानांनी आटापा हाडलो. तो मेरेन तणान भरिल्ल्या माळ्या सयत गोट्याचो अर्दो भाग जळून गोबर जालो. हाका लागून मालवणकार हांचें 90 हजारांचें लुकसाण जालें.
म्हापशें उजो पालोवपी दळाचे हवालदार सुरज शेटगांवकार, आनंद बांदेकार, अशोक वळवयकार आनी दिप्तेश गावडे ह्या पंगडान उजो नियंत्रणांत हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
