भांगरभूंय | प्रतिनिधी
दिवचल, प्रतिनिधी : व्हाळशी- दिवचले तळ्यांतलें मानगें निमाणें शुक्रारा सकाळीं रान खात्यान लायिल्ल्या पांजऱ्यांत आडकलें. हे घडणुकेक लागून लोकांनी समाधान उक्तायलां. पूण थंय आनीक एक मानगे आसा, असो दुबाव एका थळाव्या नागरिकान उक्तायला.
ह्या मानग्यान एका सुण्याचेर हल्लो केल्लो. उपरांत लोकांनी तळ्यांत देवचें न्हय असो उलो थळावे नगरसेवक विजयकुमार नाटेकार हांणी मारिल्लो.
मंगळारा एक सुणो तळ्यांतलें उदक पितना मानग्यान ताचेर झोपय घालून ताका मारून उडयल्लो. ह्या तळ्याच्या भोंवतणी लोकवस्ती आसा. हांगचीं भुरगीं, बायलां ह्या तळ्या कडेन कपडे उमळूंक वतात. मात तळ्यांत मानगें आशिल्ल्याचें आनी तांणी सुण्याचेर हल्लो केल्ल्याचें कळटांच त्या वाठारांत भंय पातळिल्लो.
रान विभाग केरीची टीम हांगा दाखल जावन तांणी तळ्यांत पांजरो घालो. तातूंत मांसाचो कुडको लायलो. तातूंत तें मानगें आडकलें. ह्या तळ्यांत आदीं मानगें आशिल्लें. तें तळ्या भायर जायते फावट दिसतालें. मात आतां ताचो भंय सोंपला. तरी तळ्यांत देंवतना सगळ्यांनी शिटूक रावचें असो उलो गोपाळ परब, यशवंत परब हांणी मारला.
थळावे आमदार डॉ. चंद्रकांत शेटये हांणी रानां अधिकार्यांक कल्पना दिले उपरांत ते हांगा दाखल जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
