भांगरभूंय | प्रतिनिधी
म्हापशें, प्रतिनिधी ः म्हापशेंच्या एकतानगर हावसिंग सोसायटींतल्या राम नारायण सिंह हांच्या फ्लॅटांत चोरी जाली. घराचे धनी, जाण्टे जोडपें दार्जिलिंगाक गेल्ल्यान घरांतल्यान कितें चोरयेक गेला तें अजून स्पश्ट जावंक ना.
सकाळीं 9 क ही घडणूक उजवाडाक आयली. बिरेस्तारा मध्यान रातीं ते शुक्रारा सकाळीं ह्या काळांत चोरांनी ही चोरी केली आसुये. रामनारायण तांचे घरकान्नी सयत फ्लॅट बंद करून दार्जिलिंगांतल्या सोयऱ्यां कडेन गेल्ले. शेजाऱ्यांक बंद फ्लॅटाचें मुखेल दार उक्तें आशिल्ल्याचें दिसलें. दाराचेर आशिल्ल्या लोखणाच्या गेटीचो हुक तशेंच दाराच्या खिळीचो हुक मोडिल्लो आशिल्लो.
लोकांनी घरांत भितर वचून पळयले जाल्यार सामान हांगा थंय पडिल्ले आशिल्ले. आलमारी फोडून तातूंतल्यो वस्तू खाटींचेर उडयल्यो आशिल्ल्यो. हांचे वयल्यान घरांत चोरी जाल्ल्याचे उक्तें जालें. उपरांत म्हापशें पुलीस आनी हावसिंग बोर्डांत रावपी फ्लॅट धनयाच्या पुताक आपयले. चोरांनी आलमारींत दवरिल्ली रोख रक्कम आनी मोलादीक वस्तू फारायल्यात. राम नारायण हांची सून दिव्या हिणें चोरी केल्ल्या रोख रक्कमेंत सुमार 15 हजार रुपया आशिल्ल्याची म्हायती दिली. जाल्यार किरकोळ रक्कमेक चोरांनी हात लायलो ना.
पुलिसांनी घडणूक थळार वचून पंचनामो केलो. निरिक्षक निखिल पालेकार हांच्या फुडारपणा खाला पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
