पुलीस कर्मचाऱ्यांनी ड्युटी करतना भलायकेची जतनाय घेवप गरजेचें: जीवबा दळवी

भांगरभूंय | प्रतिनिधी

कोरगांव, प्रतिनिधीः रात दीस पुलीस लोकांची सेवा करतात. कामाच्या ताणांतल्यान सुटका मेळोवपाक योग हो एकूच बरो उपाय. पुलीस वा हेर सगळ्यांनी दिसाक अर्द वर तरी योग करपाक जाय. खास करून जेन्ना पुलीस राष्ट्राची आनी लोकांची सेवा करतात तेन्ना लोकां कडेन बरे संबंद दवरप म्हत्वाचें. पुलीस लोकांची सेवा करपा खातीर आसात आनी भौसानय पुलिसांक सहकार दिवचो. लोकां खातीर आमी सदांच तयार आसात. ‘पयली देश’ हें वाक्य याद करून अन्याय आड झुजपा खातीर आमची भलायकी निरोगी दवरपा खातीर योग खूब म्हत्वाचो अशें सांगून पेडणेंचे उपअधीक्षक जीवबा दळवी हांणी योग दिसा निमतान पुलीस अधिकारी आनी विद्यार्थ्यांक मार्गदर्शन केलें.

श्री दत्ता पद्मनाभ पीठ आनी सद्गुरु योग गुरूकुल संयुक्त पेडणें पुलीस उपअधीक्षक अधिकारी हांणी आयोजीत केल्लो योग दीस पेडणेंच्या शेतकरी सभाघरांत जालो. ह्या वेळार जीवबा दळवी, मोपा पुलीस निरिक्षक चिमुलकार, पेडणें येरादारी पुलीस विश्वजीत चोडणकार, मोपा येरादारी पुलीस निरिक्षक महेश केरकार, श्री दत्त पद्मनाभ पीठाचे श्रीराच शेलार, गुरुदास पांडे, प्रतिभा सावळ, प्रतिक्षा सावळ, सुमेधा सावळ, योग प्रशिक्षक किशोर किंनळेकार आनी हेर लोक हाजीर आशिल्ले. तशेंच वट्ट 123 पुलीस कर्मचारी, शाळेचे विद्यार्थी आनी सद्गुरू गुरूकुलाचे कर्मचाऱ्यांनी हांतूत वांटो घेतिल्लो.
शिक्षक किशोर किंनळेकार हांणी योगा विशीं म्हायती दिवन योग करुन घेतलो. सूत्रसंचालन प्रतिक्षा सावळ हांणी केलें आनी उपकार पुलीस निरिक्षक चिमुलकार हांणी मानले.