भांगरभूंय | प्रतिनिधी
निवृत्त न्यायाधीशान डीएमके सरकाराक केलो अहवाल सादर
चेन्नय, खबरां संस्था ः तमिळनाडूच्या डीएमके सरकारान शाळांतल्या नांवातल्यान जातीवाद काडून उडोवपाचे सूत्र तयार केलां. हाचे खाला शाळेच्या आवारांत मनगटाचेर बँड, रिंग वा कपलाचेर गंध अशा गजालींचेर बंदी घालूं येता. फाटल्या वर्सा तिरुनेलवेलींत कथित दोन दलीत भाव- भयणींक उच्च जातीच्या कांय विद्यार्थ्यांनी मारपेट केल्ल्याचो आरोप आसा. हाचे उपरांत सरकारान मद्रास उच्च न्यायालयाचे निवृत्त न्यायाधीश के. चंदू हांच्या अध्यक्षते खाला एक समिती तयार केल्ली. हे समितीन 610 पानांचो अहवाल मुख्यमंत्री एम. के. स्टॅलिन हांचे कडेन दिल्लो. तांतूत केल्ले शिफारशी प्रमाण शाळेच्या नांवांतल्यान जाती संबंदीत नांवां काडून उडयतले. शिक्षकांची वेळोवेळार बदली करतले.
वर्गांत भुरग्यांक वर्णमाले प्रमाण बसयतले, शाळा कल्याण अधिकारीय आसतले.
सरकारी आनी खाजगी अशा दोनूय शाळांनी जाती संबंदीत नांवां काडून उडयतले. देखीक ‘कल्लर रेक्लेमेशन’ आनी ‘आदी द्रविड वेल्फेयर’ ह्या शाळांचीं नांवां बदलून जाती संदर्भ काडून नश्ट करतलें. हाजीरी पत्रांतय विद्यार्थ्यांची जात बरोवचे नात. वर्गांत बसपाची सुवात शुद्ध वर्णमाले प्रमाण आसपाक जाय. फकत दिव्यांग विद्यार्थ्यांक ह्या नेमांतल्यान सुट दितले.
यत्ता 6 वी ते 12 वी वर्गांतल्या विद्यार्थ्यां खातीर जाती भेदभाव, हिंसाचार, लैंगीक त्रास आनी एससी- एसटी कायदे सक्तीचे आसपाक जाय.
500 परस चड विद्यार्थ्यांच्या दरेक माध्यमीक शाळेंत शाळा कल्याण अधिकारी आसपाक जाय. जो समावेशक आनी भेदभाव नाशिल्लें वातावरण वाडोवपाचो हेत आशिल्ल्या धोरणांचेर देखरेख दवरतले. को- एडांत दोन शाळा कल्याण अधिकारी आसपाक जाय. तांतूत एके बायलेचो आस्पाव आसपाक जाय, अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
