भांगरभूंय | प्रतिनिधी
फोंडें, प्रतिनिधी: मडकय मतदार संघांतले बांदोड्यां पंचायतींत शुक्रारा जाल्ले बसकेंत रामचंद्र नायक हांची विरोधा विणें सरपंच पदार निवड जाली. हे बसके ११ मदले ७ पंच वांगडी हजर आशिल्ले.
उदरगतीचीं कामां चालीक लावपाक सगळ्यांनी सहकार्य करचें असो उलो ह्या वेळार नवे सरपंच रामचंद्र नायक हांणी मारलो. अविस्वास थाराव संमत जाले उपरांत बांदोडेंचें सरपंचपद रितें जाल्लें. शुक्रारा सकाळीं गट विकास कार्यालयाचे अधिकारी सोमनाथ तारी हांचे अध्यक्षते खाला जाल्ले बसकेंत सरपंच पदा खातीर रामचंद्र नायक हाचो एकूच अर्ज दाखल जाल्लो. ताका लागून नायक हांची विरोधा विणें निवड जाली. सचीव कृष्णा गावडे हांणी ह्या वेळार सहकार्य केलें.
वीज मंत्री सुदीन ढवळिकार हांच्या मार्गदर्शना खाला पंचायत वाठाराची उदरगत करतलों. उदरगतीचीं कामां पुराय करपा वांगडा पंच वांगड्यांचें आनी थळाव्यांचें सहकार्य गरजेचें. सगल्यांनी सहकार्य करचें, अशें सरपंच रामचंद्र नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
