भांगरभूंय | प्रतिनिधी
नवी दिल्ली, खबरां संस्था ः स्नॅपचॅट हो तरणाट्यांचो आवडीचो ॲप. कंपनी लेन्सच्या रुपांत वेगवेगळे स्नॅपचॅट फिल्टर दिता. तातूंत वापरप्यांक ओपन-सोर्स सॉफ्टवेअर वापरून रियल टायमांत तांचो लुक बदलपाक मेळटा. म्हणल्यार हें फिल्टर वापरून सोबीत फोटो काडूंक मेळटात आनी फोटो सेव्ह केल्या उपरांत हेर प्लॅटफॉर्मांचेर सहजपणान शेअर करूं येतात. तर आतां स्नॅपचॅट उपरांत व्हॉट्सॲप लेगीत तुमचे खातीर फिल्टर घेवन येता.
व्हिडियो कॉला खातीर व्हॉट्सॲपान ऑगमेंटेड रिॲलिटी (augmented reality) इफेक्ट्स सुरू करपाची येवजण करता. म्हणल्यार व्हॉट्सॲप एका खाशेलपणाचेर काम करता जंय तुमकां तुमच्या व्हॉट्सॲप व्हिडियो कॉला वेळार व्हीआर इफेक्ट्स आनी फिल्टर जोडूंक मेळटले. स्नॅपचॅट आनी ॲपलान ‘लेन्स’ आनी ‘फेस-टायम’ हातूंत एआर इफेक्ट्स सुरू केल्या उपरांत आतां व्हॉट्सॲपय तातूंत वांटो घेवपाचो आसा. फुडाराक एंड्रॉयड वापरप्यां खातीर हें नवें खाशेलपण बेगीनूच उपलब्ध जातलें.
हे नवे एआर इफेक्ट तुमकां तुमच्या व्हिडियो कॉलांत नवीन गजाली जोडूंक परवानगी दितले. वापरप्यांक तुमच्या वैयक्तीक कॉलांत फेस फिल्टर, टच-अप टूल, लो लाईट मोड आदी जायते फिल्टर वापरूंक मेळटले. तशेंच व्हिडियो कॉल चड मनोरंजक आनी आकर्शक करपी हेर इफेक्ट्स सुरू करतले.
सायबर गुन्यांव आडावपाक मजत
WABetaInfo च्या म्हायती प्रमाण कॉल करतना रियल टायम व्हिडियो फीड बदला अवतार वापरपाचो पर्यायय बेगीनूच येतलो. ह्या खाशेलपणाक लागून तुमकां तुमचें तोंड वा तुमचें नांव गुप्त दवरपाक मेळटलें वा अवतारांतल्यान हेरां कडेन उलोवपाक मेळटलें. सोशल मिडिया वरवीं सायबर गुन्यांवांचे वाडटे प्रमाण पळयल्यार, गुप्ततायेचे नदरेन वापरप्यां खातीर अवतार तयार करप हें एक खूब उपेगी खाशेलपण आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
