भांगरभूंय | प्रतिनिधी
मियाँपूर , खबरां संस्था: हैदराबादच्या मियाँपूर गांवांत पॉर्न फिल्मां पळोवपाची संवय आशिल्ल्या बापायन (३५ वर्सां) ताचे १३ वर्सां पिरायेचे नेण्टे चलयेचेर बलात्काराचो यत्न केलो. चलयेन बलात्काराचो यत्न करतना बापायक आडायलो म्हणून ताणें तिडकीन धुवेचो खून केलो. पुलिसांनी त्या बापायक अटक केल्या.
पुलिसांनी दिल्ले म्हायती प्रमाण, पुलिसांक ह्या प्रकरणांत कॅमेर्याची फुटेजूय सांपडल्या. आरोपी आनी ताची धूव रानांत चलतना दिसतात. उपरांत ताणें हो गुन्यांव केलो. सुरवातेक ताणें धूव शेणल्या, अशी कागाळ केल्ली. उपरांत चलयेची कूड कुशिल्ले अवस्थेंत सांपडली.
सीसीटीव्हीचे मजतीन केली चवकशी
नेण्टे चलयेची कूड मेळ्ळे उपरांत पुलिसांनी सीसीटीव्ही फुटेजीचे मजतीन तपास करपाक सुरवात केली. तातूंत राना मेरेन बापूय आनी ताची धूव पावल्या अशें दिसून आयलें. हें कुटूंब मुळचें मेहबुबनगराचें. चलयेची आवय दिसवड्याचेर काम करता. चलयेचे आवयन सांगिल्ले प्रमाण, ७ जुनाक सकाळीं ९ वरां मजगतीं हे चलयेन आपल्याक ह्या घरांत रावपाचें ना म्हणीत घर सोडलें. उपरांत सोयर्यांनी तिच्या बापायक हे विशीं कळयलें. उपरांत हो बापूय रानाचे दिकेन मोटार सायकलीचेर धुवेक बसोवन घेवन आयलो. उपरांत ताणें राना कडेन मोटार सायकल थारायली आनी धुवेक घेवन रानांत भितर चलत गेलो.
धुवेच्या मुखामळार वार करून केलो खून
रानांत मुखार गेल्या उपरांत ताणें धुवेचेर बलात्कार करपाचो यत्न केलो. तिणें बापायचे तावडेंतल्यान सुटपाचो यत्न करून आपूण घडिल्लो प्रकार आवयक सांगतलें अशें म्हणलें. उपरांत भियेल्ल्या बापायन तिचेर वार केलो. तिच्या मुखामळार वार करतना ती चली बेशुद्ध जाली. तिचो जीव वच मेरेन तो वार करीत रावलो. उपरांत तिका तेच अवस्थेंत थंय उडोवन तो घरा परतलो. कपडे बदल्ले आनी परत ते सुवातेर गेलो. धूव खरेंच मेली काय ना हें ताणें तपासलें आनी घरकान्नीक चली शेणलें अशें सांगलें. उपरांत पुलिशेंत कागाळ केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
