भांगरभूंय | प्रतिनिधी
भारतांतली योग संस्कृताय संवसारीक पांवड्यार मान्य जाल्या. संवसारभरांतल्या देशांनी फकत योग आपणावकूच ना, तर ताचो प्रचार आनी प्रसारय केला. आयज योग दीस. ते निमतान….
आयज 21 जून. हो दीस संवसारभर आयज ‘आंतरराष्ट्रीय योग दीस’ म्हणून मनयतात. सप्टेंबर 2014 वर्सा जाल्ले संयुक्त राष्ट्रांच्या सार्वत्रिक सभेंत 21 जून हो आंतरराष्ट्रीय योग दीस म्हणून मनोवपाचो प्रस्ताव प्रधानमंत्री नरेंद्र मोदी हांणी मांडलो.
संवसारांतल्या जायत्या देशांनी 21 जून हो सगळ्यांत व्हडलो दीस. धर्तरी सुर्या भोंवतणी भोंवपाक लागपी वेगाक लागून 21 जून हो दीस हेर दिसां परस चड लांब आसता. 21 जून दिसा उत्तरायण सोंपता आनी दक्षिणायन सुरू जाता. ह्या दिसा दीस व्हडलो तर रात ल्हान आसता. 21 जूनाक सुर्योदय बेगीन जाता आनी सांजवेळाचो चडसो वेळ मेरेन उजवाड आसता. देखून ह्या दिसाक खाशेलें म्हत्व मेळ्ळां. म्हणूनच हो दीस आंतरराष्ट्रीय योग दीस म्हणून मनोवचो असो प्रस्ताव प्रधानमंत्री नरेंद्र मोदी हांणी मांडलो. तांच्या ह्या प्रस्तावाक संयुक्त राश्ट्रांच्या 193 देशांतल्या 175 देशांच्या प्रतिनिधींनी तेंको दिलो. सुरक्षा आयोगाचे कायमचे वांगडी आशिल्ले अमेरिका, इंग्लंड, फ्रांन्स, चीन, रशिया सारकिल्ले देशूय ह्या प्रस्तावाचे सहप्रतिनिधी आसात. ह्या प्रस्तावाक डिसेंबर 2014 वर्सा परत चर्चा करून मान्यताय दिली. पयलो आंतरराष्ट्रीय योग दीस 21 जून 2015 दिसा संवसारभर मनयलो.
भारतीय पुर्विल्ले संस्कृतायेंत योग, योगासन, योगसाधना हांकां खाशेलें म्हत्व आसा. पुर्विल्ल्या काळा सावन भारतांतल्या ऋषींनी आनी साधू- संतांनी योगाचें म्हत्व, ताचे फायदे आनी ताची गरज सांगल्या. योग म्हळ्यार शरीर आनी मन हांचो मेळून केल्लो व्यायाम. आयच्या व्यस्त जिवितांत आमी योगा वरवीं आमची कूड तंदुरुस्त दवरूंक शकतात; ते भायर मनाचेरुय बरे संस्कार करपाक शकतात. भारतांतली योग संस्कृताय संवसारीक पांवड्यार मान्य जाल्या. संवसारभरांतल्या देशांनी फकत योग आपणावकूच ना, तर ताचो प्रचार आनी प्रसारय केला. कोरोना धामीच्या काळांत योग दिसाक खाशेलें म्हत्व मेळ्ळें. कोरोना सारके धामी आड झुजपाक जाय जाल्यार आमचे कुडीची रोगप्रतिकार शक्त वाडोवपाचेर लक्ष केंद्रीत करपाक जाय. नेमान व्यायाम आनी योग केल्यार तुमची रोगप्रतिकार शक्त वाडूंक शकता.
योग कसो करचो, खंयची योगासनां मनाक, कुडीक सक्षम दवपपाक शकतात, हाचेर विद्वानांनी मतां दिल्यांत. ते प्रमाण दर दिसा योग सराव करप गरजेचें आसा. आयज योग दिसा निमतान एक दीस योग करून ताचे फोटो सोशल मिडियाचेर घालून ह्या दिसाचो इव्हेंट करीनासतना योग खऱ्या अर्थान स्विकारचो. नेमान योग करचो. संवसारान योगाक राज मान्यताय दिल्या. आमीय नेमान योगाचो अभ्यास, सराव करून योगसाधना केली तरुच आयच्या योग दिसाचें सार्थक जातलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
