वेग राखिनाशिल्ल्या गाडयांक सुपरफास्ट वळेरेंतल्यान काडून अधिभार रद्द करचो

भांगरभूंय | प्रतिनिधी

कोकण विकास समितीची रेल्वे प्रशासना कडेन मागणी

मडगांव, प्रतिनिधी : ज्यो गाडयो ५५ किमी आनी ताचे परस चड वेग राखून प्रवास पुराय करतात तांकां सुपरफास्ट म्हणटात. ताका लागून कोकण रेल्वे मार्गाचेर सुपरफास्ट टॅग आशिल्ल्या मात वेग राखिनाशिल्ल्या गाडयांक सुपरफास्ट वळेरेंतल्यान काडून अधिभार रद्द करचो, अशी मागणी कोकण विकास समितीन रेल्वे प्रशासनाकडेन केल्या.
कोकण विकास समितीन रेल्वे प्रशासनाक बरयल्ल्या पत्रांत म्हणलां, रेल्वे बोर्डाचो २००६तलो १०५ वो निर्णय आनी रेल्वे मंत्रालयान दिल्ल्या सुचवण्यां प्रमाण दोनूय दिकांक वरभर सुमार ५५ किमी वा ताचे परस चड वेगान धांवपी गाडयांक सुपरफास्टचो दर्जो दितात. ह्या गाडयांतल्यान प्रवास करतना दरेका प्रवाशा फाटल्यान दुसरे श्रेणी खातीर १५ रुपया, एसी चेअर कार, एसी थ्री टायर इकॉनॉमी, एसी थ्री टायर आनी एसी टू टायरा खातीर ४५ रुपया, एसी पयली श्रेणी आनी विस्टाडोमा सारकिल्ल्या श्रेणीं खातीर ७५ रुपया अधिभार दिवचो पडटा.
कोकण रेल्वेचेर १९९५ सावन पयलींच प्रवासी भाड्याचेर ४० टक्के अधिभार लागू आसा. ताका लागून रेल्वे प्रणालींत अंतर १.४ पट नमूद करता. ताका लागून मुंबय-मडगांव मजगतीं आशिल्ले ५९० किलोमीटरांचें अंतर प्रवासी भाडें थारायतना ७६५ किलोमीटर इतलें मेजतात. विभागीय रेल्वे हेंच अंतर दाखोवन सुपरफास्ट अधिभार घेवपाचो यत्न करतात. मात रेल्वे बोर्डान कळयिल्ले प्रमाण गाडी सुपरफास्ट आसा वा ना हें थारावपाक प्रत्यक्ष अंतराचोच विचार करचो असो नेम आसा. ताका लागून ४० टक्के अधिभारीत अंतर विचारात घेवचो न्हय.
कोकण रेल्वे मार्गार व्हड अपघातांक लागून फाटलीं दोन दसकां दर वर्सा १० जून ते ३१ ऑक्टोबर ह्या काळांत कोकण रेल्वे मार्गार पावसाळी वेळापत्रक लागू करता. सुरक्षिततायेच्या हेतान गाटयो मर्यादीत वेगान चलयतात. व्हडल्या अंतरा खातीर वराक ७५ वा ९० किलोमीटरची मर्यादा लागू करता. मात सुपरफास्ट गाडयेच्या निकशांत कसलेच तरेचो बदल वा मर्यादा ना.
दोनूय दिकेन कोकण रेल्वे मार्गावेल्यो १६ गाडयो सरासरी ५५ किमी वर असो वेग राखिना. ह्यो गाडयो आजूनय सुपरफास्ट म्हणून वर्गीकृत आसात आनी पावसाळी वेळापत्रकांत म्हळ्यार वर्साक १४४ दिस (३९.४५ %) सुपरफास्ट ट्रेनीचोे निकश पुराय करिनासतनाय त्या गाडयांचेर अधिभार लायता. हातूंत मध्य रेल्वेच्या ७, दक्षिण रेल्वेच्या ४, पश्चिम रेल्वेच्या ३ आनी पश्चिम मध्य रेल्वे आनी उत्तर पश्चिम रेल्वेच्या दरेकी एके गाडयेचो आसपाव आसा. जनशताब्दी, तेजस, हमसफर, दुरांतो, गरीबरथ ह्यो तांतल्यो विशेश गाडयो थारतात. फुडल्या वर्सा हातूंत कोकणकन्या एक्सप्रेसीचोय आसपाव जावपाची शक्यताय आसा. केंद्र सरकार (रेल्वे) वयल्या भारताचे नियंत्रक आनी महालेखापरीक्षक हांच्या २०२१ च्या लेखापरीक्षण अहवाल क्रमांक २२ त नमूद केल्ले प्रमाण, ४७८ सुपरफास्ट गाडयां मदल्या १२३ (२६ टक्के) गाडयांचो नियोजित वेग ५५ किमी एका वरा परस उणो राखला.
आदीं १० जुलय, २०२१ दिसा पात्र नाशिल्ल्या गडयांचो सुपरफास्ट अधिभार काडपाची मागणी रेल्वे बोर्ड, रेल्वे मंत्री, कोकण रेल्वे, मध्य रेल्वे, पश्चिम रेल्वे, दक्षिण रेल्वे, पश्चिम मध्य रेल्वे आनी उत्तर पश्चिम रेल्वेक ईमेल्सा वरवीं केल्ली. सगळ्या रेल्वे विभागांनी तांच्यो गाडयो आसूनय पावसाळी वेळापत्रक कोकण रेल्वे कडल्यान लागू केल्ल्यान गाडयांच्या प्रकारांत बदल करपाक न्हयकार दिला. कोकण रेल्वेनूय बदल करपाक मेळचो ना अशीच जाप दिल्या. मात गाडयो सुपरफास्टा खातीरचे निकश पुराय करिना हें मान्य केल्लें, अशें कोकण विकास समितीचे अध्यक्ष जयवंत दरेकार हांणी सांगलें. तरीय ह्यो गाडयो जो मेरेन सुपरफास्ट एक्स्प्रेसा खातीर नर्धारीत केल्ले निकश पुराय करिनात तो मेरेन तांचें वर्गीकरण सुपरफास्टा जाग्यार साधारण मेल वा एक्स्प्रेस म्हणून करून सुपरफास्ट अधिभार घेवप बंद करपाची मागणी केल्या.