भांगरभूंय | प्रतिनिधी
चेन्नय, खबरां संस्था ः तामीळनाडूंच्या कल्लाकुरिची गांवांत बुधवारा रातीं 29 जाणांक मरण आयिल्ल्यान एक धक्को दिवपी घडणूक उजवाडाक आयल्या. विखारी सोरो पियेवन ह्या 29 जाणांक मरण आयिल्ल्याचो दुबाव कल्लकुरी जिल्ल्याचे जिल्लोधिकारी एम. एस. प्रशांत हांणी उक्तायला. हाचे भायर जिल्ह्यांतल्या 70 परस चड लोकांक उपचारा खातीर हॉस्पिटलांत दाखल केल्यात. ते भायर पुदुच्चेरींतय 15 जाण विखारी सोरो पियेवन अस्वस्थ जातकच तांकां हॉस्पिटलांत दाखल केल्यात. उपचार घेवपी कांय जाणांची स्थिती गंभीर आसा. देखून मरण आयिल्ल्यांचो आंकडो आनीक वाडपाची शक्यताय आसा.
कल्लाकुरीची जिल्ह्यांतल्यान व्हड प्रमाणांत दुयेंती ओंकारी आनी हेर कागाळीं खातीर बुधवारा रातीं कल्लाकुरी हॉस्पिटलांत दाखल जाले. विल्लूपुरम, सालेम आनी पुदुच्चेरी हांगाच्या हॉस्पिटलांत तांची तपासणी केली तेन्ना विखारी सोरो पियेल्ल्यान तांकां हो त्रास जालो असो अदमास हॉस्पिटल आनी प्रशासनान काडलो.
पुलिसांची कारवाय, एकल्याक अटक
मजगतीं, तमिळनाडू पुलिसांनी ह्या प्रकरणाची चवकशी सुरू करुन 49 वर्सां पिरायेच्या गोविंदराज उर्फ कन्नुकुट्टी हाका अटक केल्या. तांचे सयत अजून तिगांक धरल्यात. बेकायदेशीर रितीन सोरो विकपाच्या प्रकरणांत ही कारवाय केल्या. गोविंदराज हाचे कडल्यान पुलिसांनी 200 लिटर सोरो जप्त केला. ह्या सोऱ्याचे नमुने रोखडेंच विल्लुपुरमांत चांचणी खातीर धाडले. तातूंत व्हड प्रमाणांत विखारी ‘मिथेन’ आशिल्ल्याचें कळटकच पुलिसांनी कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
