भांगरभूंय | प्रतिनिधी
नवी दिल्ली, खबरां संस्था: देशांत फाटल्या २४ वरांनी दिल्लीक १४ जाणांक जाल्यार उत्तर प्रदेशांत ८१ जाणांक मरण आयलां. हाका लागून उत्तर प्रदेशांतल्या जायत्या जिल्ह्यांनी रेड अलर्ट जाहीर केला. उश्णतायेच्या ल्हारान ह्या राज्यांची वाट लावन उडयल्या. जायत्या जाणांक हॉस्पिटलांत दाखल केल्यात. जूनांत उश्णतायेचो आताक (Heat Stroke) आयिल्ल्या दुयेंतीं मदीं बरीच वाड जाल्या. हॉस्पिटलांतल्या खाटींचो आंकडो मतींत घेतल्यार फकत गंभीर दुयेंतींकूच दाखल करतात.
कानपुराक तेरा जाणांक मरण
उत्तर प्रदेश भलायकी खात्यान दिल्ले आंकडेवारी प्रमाण, कानपुरांत १३ जाणांक मरण आयलां. फतेहपूर १२, चित्रकुटांत ९, उन्नाव ६, बांदा ४, उरई ६, इटावा, प्रतापगड ४, जाल्यार बरेली, प्रयागराज आनी कौशंबी जिल्ह्यांत दरेकी एकल्याक मरण आयलां. फुडले चार दीस हें ल्हार आसतलें. हाका लागून जायत्या जिल्ह्यांनी रेड अलर्ट जारी केला. कानपुरांत चड उश्णतायेक लागून एक मुखेल हवालदार बेशुद्ध जालो. पूण ताका हॉस्पिटलांत व्हरचे बदला ताच्या सहकार्यान ताचो व्हिडियो केलो. जेन्ना लोकांनी ताका विरोध केलो. ताका हॉस्पिटलांत व्हरता म्हणसर मरण आयिल्लें.
उश्णतायेक लागून लोक दुयेंत
उश्णतायेक लागून लोक दुयेंत पडपाक लागल्यात. लोकां मदीं जोर येवप, घुंवळ येवप आनी तकली दुखप अशीं लक्षणां दिसपाक लागल्यांत. हॉस्पिटलांत चडशे दुयेंती उश्णतायेक लागून आसात. हॉस्पिटलांतल्या दुयेंतींचो आंकडो वाडिल्ल्यान दोतोरांक अलर्ट मोडांत रावपाक सांगलां. काम करिनासतना भायर सरचें न्हय, तशेंच भायर सरतना जतनाय घेवची आनी उदकाची बाटली आपल्या वांगडा दवरची असो सल्लो दोतोरांनी दिला.
नोयडा १४ जाणांक मरण
फाटल्या २४ वरांत नोयडा शारांत १४ जाणांक दुबावीतपणान मरण आयलां. तांकां सगळ्यांक उश्णतायेक लागून मरण आयिल्ल्याचें म्हण्टात. नोयडा हांगा ६ ते ७ अनवळख्यांच्यो कुडी मेळ्ळ्यात. ताच्या मरणाचें खरें कारण पोस्टमार्टमा उपरांत कळटलें अशें नोयडा सीएमओ रेणू अग्रवाल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
