भांगरभूंय | प्रतिनिधी
नवी दिल्ली, खबरां संस्था: वैजकी प्रवेश परिक्षे संबंदी देशभर व्हड वाद जाला. मजगतीं, आतां राष्ट्रीय परिक्षा एजन्सी कडल्यान चलयल्ली यूजीसी-नेट परिक्षा रद्द करपाचो निर्णय केंद्रीय शिक्षण खात्यान घेतला. ह्या प्रकरणांतल्या गडबडीची चवकशी करपाचें काम शिक्षण मंत्रालयान सीबीआयक दिलां. यूजीसी नेट पेपर लीक जाल्ल्याचो आरोप जाले उपरांत हो निर्णय घेतला. युजीसी-नेट परिक्षा रद्द जाले उपरांत आतां विरोधकांनी केंद्र सरकाराचेर लक्ष्य केलां.
पयलेच फावट राष्ट्रीय पात्रता परीक्षा (NET) १८ जुनाक पेन अँड पेपर हे पद्धतीन आयोजीत केल्ली. लिखीत स्वरुपाचे हे परिक्षे खातीर ११ लाख इतल्या परीक्षार्थ्यांनी नोंदणी केल्ली. आदीं वैजकी पूर्वपरीक्षा नीटात गडबड जाल्ल्याचो आरोप जाले उपरांत ती रद्द केल्ली. आतां नेट परिक्षेंत जाल्ले गडबडीक लागून परिक्षा आयोजीत करपी एजन्सी दुबावाच्या भोंवर्यांत सांपडल्या.
१९ जूनाक विद्यापीठ अनुदान आयोग, युजीसीक गृह मंत्रालया खाला येवपी सायबर गुन्यांव पंगडान (I4C) हे गडबडी विशींची म्हायती दिल्या.
परत नवी परिक्षा
युजीसी- नेट जून २०२४ ची परिक्षा रद्द करपाचो निर्णय घेतिल्ल्याचें केंद्रीय शिक्षण मंत्रालयान स्पश्ट केलें. आतां परत परिक्षा घेतले. बेगीनूच हे संबंदी म्हायती जाहीर करतले. पेपर लीक प्रकरणाची खोलायेन चवकशी करपा खातीर हें प्रकरण सीबीआय कडेन सोंपयिल्ल्याचें शिक्षण खात्यान जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
