भांगरभूंय | प्रतिनिधी
भाजी मार्केटूय बांदपाचो प्रस्ताव नगरनियोजन मंत्र्या कडेन
भांगरभूंय । प्रतिनिधी
वास्कोः वास्कोच्या विवीध भागांतले चिकन, मटण विक्रेत्यांक एका पाख्या खाला हाडचे खातीर सध्याच्या चिकन मार्केटाचे सुवातेर सुसज्ज अशें चिकन, मटण मार्केट बांदतले. तशेंच साबार वाठारांनी बसपी भाजी, फळ तशेंच हेर म्हाल विक्रेत्यां खातीर भाजी मार्केट बांदतले. ते संबंदीचो प्रस्ताव नगरविकास मंत्र्यान धाडपाक सांगलां. त्या प्रस्तावांक तत्काळ मंजरी दिवपाचें आस्वासन मंत्र्यान दिलां, अशी म्हायती वास्कोचे आमदार कृष्णा साळकार हांणी दिली.
साळकार हांणी हालींच निगरविकास मंत्र्यांची भेट घेवन वास्कोच्या विवीध प्रकल्पा संबंदांत चर्चा केली. ह्या वेळार पंचायत मंत्री मॉवीन गुदिन्हो, मुख्याधिकारी दीपेश प्रियोळकार आनी हेर अधिकारी हाजीर आशिल्ले. वास्को चिकन, मटण मार्केट आसा. पूण थंय फावोश्यो सुविधा नात. ताका लागून विक्रेत्यांची आनी गिरायकांची व्हड गैरसोय जाता. तशंच सध्या हेर वाठारांत लेगीत चिकन, मटण विक्रेत्यांनी आपलो वेवसाय सुरू केला. चिकन मार्केटाच्या सुवातेर सुसज्ज मार्केट तशेंच भाजी मार्केट बांदपाचो प्रस्ताव आसा. त्या मार्केटांत सगळ्यांक आस्पावन घेतले. ह्या दोनूय मार्केटा संबंदांत आपणे मंत्र्यां कडेन चर्चा केल्या. तांणी सकारात्मक प्रतिसाद दिला, अशें साळकार हांणी सांगलें.
मार्केटांतलीं कांय जाणांचीं दुकानां तांच्या नांवार नात. फाटलीं कांय वर्सा हो प्रस्न प्रलंबीत आसा. तो बेगीन सोडोवपाची गरज आसा. तीं दुकानां संबंदितांच्या नांवार केल्यार त्या दुकानकाराक आपल्या दुकाना संबंदांत शाश्वती मेळपाक मजत जातली. ते भायर मुरगांव पालिकेचो महसूल वाडटलो. चर्चे वेळार मंत्र्यांनी पालिका संचालकांक ह्या दुकाना संबंदांत अहवाल तयार करपाचे निर्देश दिल्या. हो प्रस्न सुटचो हे खातीर पावसाळी अधिवेशनांत चर्चा जावपाची शक्यताय आसा.
वास्कोच्या भलायकी खात्याचें ल्हान भुरग्यां खातीर आदीं मुरगांव पालिका
इमारतींत आशिल्लें. इमारतीचें दुरुस्तीचें काम सुरू जाले उपरांत तें बायणा रवींद्र भवनांत व्हेल्लें. आतां रवींद्र भवन पुराय तांकीन सुरू जाल्ल्यान तें केंद्र वास्कोचे एके इमारतीच्या दुसऱ्या माळ्यार व्हेलां. ती सुवात सामकीच गैरसोयीची आसा. ताका लागून तें केंद्र परतून मुरगांव पालिका इमारतींत व्हरचें हे खातीर मंत्र्यां कडेन चर्चा केली. मंत्र्यान मुख्याधिकाऱ्याक तें केंद्र आदले सुवातेर व्हरचें, अशी सुचोवणी केल्या. ताका लागून म्हयन्याभरांत तें आदले सुवातेर येतलें. जाका लागून पालकांची गैरसोय पयस जातली, अशें साळकार हांणी स्पश्ट केलें. मुरगांव पालिके कडेन कामगार वर्गाचो उणाव ना. ताका लागून संबंदीत कामगार घेवचे खातीर प्राधान्य दिवचें, अशी विनवणी मंत्र्यां कडेन केली. तशेंच हिंदुस्थान पॅट्रोलियमा कडल्यान वन टायम सेटलमेंटा खाला येवपी 12 कोटी मेळचे हे खातीर मान्यताय दिवची, अशी विनवणी केल्या. जे वरवीं मुरगांव पालिकेची अर्थीक परिस्थिती सुदरपाक मजत जातली, अशें साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
