भांगरभूंय | प्रतिनिधी
लोकां मदीं भंय; रान खात्यान लायलो पांजरो
भांगरभूंय । प्रतिनिधी
दिवचलः व्हाळशी दिवचले सैमीक आनी खूब प्रमाणांत उदक आशिल्ल्या तळ्यांत मानग्यांचो वावर वाडिल्ल्यान ह्या वाठारांतल्या लोकांनी सादूर रावचें, उदकांत देंवचें न्हय, असो उलो थळावे नगरसेवक विजयकुमार नाटेकार हांणी मारला.
मंगळारा तळ्यांत एक सुणो उदक पियेतना मानग्यान ताचेर झोपय मारली आनी ताका मारलो. ह्या तळ्याचे भोंवतणी लोकवस्ती आसा. लोक, बायलो, भुरगीं दिसपट्टी तळाच्या वाठारांत येतात वतात. त्या तळ्यांत तांकां मानगें दिशिल्ल्यान आनी ताणें सुण्याक मारिल्ल्यान लोकां मदीं भंय पातळ्ळा.
बुधवारा रान विभाग केरीचो पंगड थंय आयलो आनी तांणी तळ्यांत पांजरो लायला. ताका मांसाचो कुडको लायला. तें मानगें ह्या सांपळ्यांत सांपडूं येता, अशें रान कर्मचाऱ्यांनी सांगलें.
ह्या तळ्यांत आदीं मानगें आशिल्लें. पूण उपरांत तें कोणाक दिसूंक नाशिल्लें. तें आतां परतून दिशिल्ल्यान लोकांनी भंय बाळगिला. त्या तळ्यांतल्या उदकाचो लोक न्हांवपा- धुंवपाक वापर करतात. ह्या तळ्यांत मानगें दिशिल्ल्यान सगळ्यांनी सादूर रावचें, उदकांत देंवतना खबरदारी घेवची, अशें गोपाळ परब, यशवंत परब हांणी सांगलें. थळावे आमदार डॉ. चंद्रकांत शेट्ये हांणी रान अधिकाऱ्यांक कल्पना दिले उपरांत बुधवारा रान विभागाचो पंगड आयलो आनी थंय पांजरो लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
